«Լուսավոր Հայաստան» խմբակցության պատգամավոր Սրբուհի Գրիգորյանը երեկ է վերադարձել Սյունիքից, ունեցել է քննարկումներ և հանդիպումներ սյունեցիների հետ, սակայն ոչ մի լավ լուր չի կարող հաղորդել լրագրողներին։ Ըստ պատգամավորի՝ ժողովրդի անվտանգության հարցը կարգավորված չէ, բայց երբ այս հարցը բարձրացնում են խորհրդարանում, կառավարության ներկայացուցիչները փորձում են խուսանավել։
«Սոցիալական խնդիրներ են փորձում լուծել, բայց եթե անվտանգության խնդիրը Սյունիքում լուծված չէ, ինչքան ուզում ես բնակելի տուն կառուցիր, փոխհատուցում տրամադրիր, առաջնային խնդիրը մնում է անվտանգության խնդիրը։ Իսկ գիտենք, որ ադրբեջանցիները հիմա անցել են նաև հոգեբանական պատերազմի։ Երբ որ անցնեք Սյունիքով, դեպի Կապան ճանապարհին գրված է՝ «բարի գալուստ Ադրբեջան»։ Ես կարծում եմ, որ կառավարությունը, այդ թուղթը ստորագրելուց առաջ, պիտի երաշխավորություն վերցներ Ադրբեջանից, որ առաջիկա 5-10 տարիների ընթացքում ռազմական որևէ գործողություն չի իրականացնելու, նոր հետո համաձայներ այդ տարածքները տալ»,- ճեպազրույցի ընթացքում ասաց ԼՀԿ-ի ներկայացուցիչը։
Գրիգորյանի խոսքով՝ սահմանները, ադրբեջանցիների դիրքերը շատ են մոտեցել համայնքներին և Ներքին Խնձորեսկում, Սիսիանում և Կապանում իրավիճակը անկանխատեսելի է, քանի որ գարնանը վերսկսելու են գյուղատնտեսական աշխատանքները և հնարավոր են գերեվարման դեպքեր։
Սրբուհի Գրիգորյանը հայտնեց, որ ինքը Սյունիքում կրակոցներ չի լսել և «Բայրաքթար»-ներ չի տեսել, բայց ադրբեջանցիների կողմից փորձ է արվում վախի մթնոլորտ ստեղծել մարզում։ Ճանապարհային միջադեպեր դեռևս չեն գրանցվել, բայց ցանկացած սրացման դեպքում այդ ճանապարհներով երթևեկելը վտանգավոր է լինելու։
Պատգամավորը նշեց, որ միայն նիստերով այս իշխանությունները անկարող են լուծել անվտանգության խնդիրները։
Քրիստինե Հովսեփյան
