Արտահերթ ընտրություններ պետք են, թե՝ ոչ, պետք է որոշի հասարակությունը։ Հասարակությունն արտահերթ ընտրությունների կարիք չի տեսնում, այդպիսի պահանջ չկա, և այդ մասին է վկայում այն, որ իշխող ուժի հայտարարությունից հետո հասարակության լայն շերտերը դժգոհություն չարտահայտեցին։ Այս մասին ասուլիսի ժամանակ հայտարարեց «Իմ քայլը» դաշինքի պատգամավոր Գևորգ Պապոյանը։
«Մենք գրեթե միայնակ մնացինք մեր առաջարկի հետ։ Այսինքն՝ մենք առաջարկեցինք արտահերթ ընտրություն, բայց, բացի արտախորհրդարանական մի քանի ուժերից, մնացած ուժերը, ըստ էության, հայտարարեցին կա՛մ իրենք չեն մասնակցելու, կա՛մ արտահերթ ընտրություններ պետք չի, կա՛մ էլ էնպիսի պահանջներ դրեցին, որոնք որ նույն բանն են։ Այսինքն՝ մենք չենք ուզում, բայց չենք կանգնում միանգամից ասենք՝ չենք ուզում արտահերթ ընտրություններ։ Էնպիսի պահանջ են դնում, որն անիրագործելի է, դիմացինը չի կարող դրա հետ համաձայնել, որի արդյունքում քո ուզածը տեղի կունենա»,- ասաց պատգամավորը։
Գևորգյանի կարծիքով՝ խորհրդարանական ընդդիմությունը համոզված չէր, որ արտահերթ ընտրությունների դեպքում կունենա այնքան մանդատ խորհրդարանում, որքան այսօր ունի, իսկ արտախորհրդարանական ընդդիմության մեծ մասն էլ վստահ չէր, որ ընդհանրապես կհայտնվեր Ազգային ժողովում։ Հետևաբար իշխող ուժը եկավ այն եզրակացության, որ պետք չէ անցկացնել մի ընտրություն, որին կմասնակցեն միայն իրենք ու մի քանի կուսակցություններ։
Իմքայլականը ենթադրում է, որ 2018-ի խորհրդարանական ընտրություններից հետո հասարակության շրջանում կարծիքների մեծ փոփոխություն չի եղել, քանի որ իրենց՝ այս շրջանում արտահերթ ընտրություններ չանցկացնելու որոշմանը ժողովուրդը չընդդիմացավ։ Գևորգ Պապոյանը նաև ընդգծեց՝ հանդիպումներ է ունենում իր ընտրողների հետ և հասարակության շրջանում վարչապետի հրաժարականի պահանջ չկա։ Ավելին՝ խնդրում են փոխանցել, որ Նիկոլ Փաշինյանը հրաժարական չտա,
«Վարչապետին ասեք՝ մեզ մենակ չթողնի, արտահերթ ընտրություններ մեզ պետք չի, այ էտպիսի բաներ շատ եմ լսում։ Հա, մեկ – մեկ լսում եմ, որ պետք է, բայց անգամ 2018 թվականին մարդկանց 28 տոկոսը մեզ չի ընտրել, անգամ էտ ժամանակ։ Իհարկե, դրանք 100 հազարավոր մարդիկ են, սա նորմալ է աշխարհի բոլոր երկրների համար։ Պահանջը սա է՝ գնացեք, աշխատեք։ Մենք ձեզ տվել ենք աշխատելու հնարավորություն, գնացեք, աշխատեք։ Մի տարի կորցրել եք համավարակի պատճառով, մի տարի լավ աշխատել եք, բայց ձեզ խանգարել է պատերազմը և համավարակը, 21-ը պետք է լինի վերականգման տարի, 22-ը և 23-ը պետք է լինեն տնտեսական զարգացման տարի։ Սա մարդկանց ակնկալիքն է»,- ամփոփեց Գևորգ Պապոյանը։
Քրիստինե Հովսեփյան
