«Մենք ունենք (կորոնավիրուսով վարակված քաղաքացիների) թվերի բարձրացում, դրական տեստավորվածների տոկոսը հասել է 16-ի, և վերջին ամիսների մեր կառավարելի վիճակը մեր բոլորի զգոնությունը թուլացրել է, բայց այսօր մենք պետք է հստակ գիտակցենք, որ ունենք շանս՝ կանխարգելելու, զսպելու աճը և անելու ամեն ինչ, որպեսզի պաշտպանենք մեր առողջությունը, մեր տնտեսությունը և հետագա սահմանափակումների չգնանք»,- լրագրողների հետ զրույցում ասաց ԱՆ նախարար Անահիտ Ավանեսյանը։
Ավանեսյանը շեշտեց՝ պետք է ինքներս կարգապահություն դրսևորենք, որպեսզի չկիրառվեն տուգանքներ։
«Կառավարության նիստին հնչեց նաև, որ հանձնարարական է տրված, որ վերահսկողական մարմինները, Ոստիկանությունը իրենց աչալրջությունը սրեն և հնարավորության սահմաններում ապահովեն քաղաքացիների կարգապահությունը»,- հայտնեց Ավանեսյանը։
Լրագրողների այն նկատառմանը, որ իշխանության ներկայացուցիչները նույնպես չեն կրում՝դիմակներ, ավելին՝ բազմահազարանոց հանրահավաքներ են կազմակերպում, որոնց հիմնականում մասնակցում են առանց դիմակների, նախարարը նկատեց, որ վերջին հանրահավաքներին ինքն էլ է մասնակցել, միշտ եղել է դիմակով և հորդորում է բոլորին կրել դիմակներ։
Ըստ գերատեսչության ղեկավարի՝ բացի հանրահավաքներից հարյուր հազարավոր քաղաքացիներ առանց դիմակ են շրջում քաղաքում, փակ տարածքներում նույնպես չեն կրում դիմակներ, սակայն այս պահից սկսած պետք է վերադառնալ դիմակների խիստ կրմանը, որոնք մատչելի, պարզ միջոցներ են՝ կորոնավիրուսից խուսափելու համար։
Քրիստինե Հովսեփյան
