Արտահերթ ընտրությունների մասով «Բարգավաճ Հայաստան» խմբակցությունը դեռ չունի վերջնական որոշում, բայց միանշանակ է, որ այս ծանր օրերին սատարում է Բանակին։
Բանակը եղել է, կա ու մնում է Հայաստանի Հանրապետության, հայ ազգի ամենակարևորագույն ինստիտուտը, և իշխանությունները պարտավոր են հաշվի նստել Բանակի կարծիքի հետ. այս մասին ԱԺ ճեպազրույցների ժամին հայտարարեց «Բարգավաճ Հայաստան» խմբակցության պատգամավոր Արման Աբովյանը։
Նրա խոսքերով՝ իրավիճակը, որ ստեղծվել է իշխանությունների անհասկանալի և անիմաստ գործողությունների հետևանքով, ամեն հաջորդող օրվա հետ ավելի խորանում և ծանրանում է։
Աբովյանը նշեց, որ ֆրակցիայի ներսում դեռ քննարկումներ չեն եղել, ուստի արտահերթ ընտրությունների վերաբերյալ չկա վերջնական և միասնական որոշում և չի կարող ասել, թե Գլխավոր շտաբի և կառավարության միջև եղած հակամարտությունը որքանով կազդի խմբակցության որոշման վրա։
Միքայել Մելքումյանը թիմակցի խոսքին հավելեց՝ Բանակը սովորական կառույց չէ, Բանակը մեր պետականության, անվտանգության երաշխավորն է, այսօր՝ պարտությունից հետո, Բանակը ծանր օրեր է ապրում, և բոլորս պետք է կանգնենք մեր երաշխավորի՝ Բանակի կողքին։
Քրիստինե Հովսեփյան
