Միջպետական հարաբերություններում կարևոր է փոխադարձության սկզբունքը | Արա Այվազյան

«Ինչպես միջանձնական, այնպես էլ միջպետական հարաբերություններում ամենակարևորը փոխադարձության սկզբունքն է»,- անդրադառնալով Թուրքիա – Հայաստան հետագա փոխգործակցության վերաբերյալ հայտարարություններին՝ ԱԺ արտաքին հարաբերությունների մշտական հանձնաժողովի արտահերթ նիստում ասաց ԱԳՆ նախարար Արա Այվազյանը։ Նա հավելեց, որ 20-րդ դարի առաջին ցեղասպանությունը վերապրած հայ ժողովուրդը թերևս լավ է գիտակցում խաղաղության գինը և չի փնտրում թշնամիներ.

Արա Այվազյանը հիշեցրեց՝ Հայաստանի անկախացման առաջին իսկ օրվանից մինչև վերջերս, Հայաստանը տարբեր նախաձեռնություններով է հանդես եկել Թուրքիայի հետ հարաբերությունների ուղղությամբ, և վերջինը Ցյուրիխյան գործընթացն էր, «որը ի չիք դարձվեց Թուրքիայի կողմից»։

«Մեր՝ իսկապես ազնիվ և առանց նախապայմանների հարաբերությունների կարգավորման վերաբերյալ նախաձեռնությունը չփոխադարձվեց պաշտոնական Անկարայի կողմից, ավելին՝ անցած դարվա հայատացությունը, որի գագաթնակետն էր Հայոց ցեղասպանությունը, կարծես թե ոչ միայն չի դադարեցվել, այլ նաև արտահանվել է մեր տարածաշրջան», – փաստեց նախարարը։

Այվազյանը շեշտեց՝ բոլորը գիտակցում են, թե ինչ հեռանկարներ և հնարավորություններ կարող են ստեղծել խաղաղությունը և, ի վերջո, հաշտեցումը, բայց դրանք լոկ գեղեցիկ բառեր չեն։ Որպեսզի իրապես լինի խաղաղություն մեր տարածաշրջանում, Հայաստանն ակնկալում է, որ Թուրքիան արմատական փոփոխությունների կենթարկի Հայաստանի հանդեպ իր ագրեսիվ քաղաքականությունը և կվերացնի թշնամական գործողությունները։

Արտաքին գերատեսչության ղեկավարի խոսքով՝ պատմության մեջ շատ կան դեպքեր, երբ ողբերգական անցյալ ունեցող երկրներ գտել են քաղաքական կամք և հասկացել են անհրաժեշտությունը ձևավորելու նորմալ, բարիդրացիական հարաբերություններ։ Այվազյանը լիահույս է, որ «Թուրքիան մի օր այդ գիտակցությանը կգա»։

Վերջինս ընդդգծեց՝ Արտաքին գործերի նախարարությունը տեղյակ չէ այսօր ընթացող որևէ երկխոսության կամ բանակցությունների մասին։

Քրիստինե Հովսեփյան