Հայկ Չոբանյանը կնշանակվի ՀՀ բարձր տեխնոլոգիական արդյունաբերության նախարար. վարչապետ

Հայկ Չոբանյանն ազատվեց Տավուշի մարզպետի պաշտոնից: Որոշումն ընդունվեց կառավարության այսօրվա նիստում: Նա կնշանակվի ՀՀ բարձր տեխնոլոգիական արդյունաբերության նախարար:

«ՀՀ բարձր տեխնոլոգիական արդյունաբերության նախարար Հակոբ Արշակյանը լքում է իր պաշտոնը, եւ պարոն Արշակյանի փոխարեն նախարար կնշանակվի պարոն Չոբանյանը: Ես ուզում եմ պարոն Արշակյանին շնորհակալություն հայտնել կատարած աշխատանքի համար: Ըստ էության զրոյից նախարարություն է ստեղծվել, ձևավորվել: Դա բավական բարդ է, որ արվել է բավական լավ: Ես ուզում եմ պարոն Չոբանյանին հաջողություններ մաղթել  ՀՀ բարձր տեխնոլոգիական արդյունաբերության նախարարի կարգավիճակում»,- հարցի քննարկման ժամանակ հայտարարեց ՀՀ վարչապետ Նիկոլ Փաշինյանը:

Հիշեցնենք, որ Հակոբ Արշակյանը երեկ ֆեյսբուքյան իր էջում տեղեկացրել է պաշտոնից ազատվելու մասին: Նա որպես պատճառ նշել իր եւ լրագրողի միջեւ երկու շաբաթ առաջ տեղի ունեցած աղմկահարույց միջադեպը: «Որպես Հայաստանի Հանրապետության քաղաքացի՝ անընդունելի եմ համարում պաշտոնյայի կողմից որևէ քաղաքացու նկատմամբ բռնության կիրառումը, մենք պարտավոր ենք շարժվել առանց բռնության հասարակություն ունենալու ճանապարհով»,- գրել է նա: