Հայաստանը մյուս շաբաթ ձեռք կբերի չինական «Սինովակ» արտադրության «Կորոնավակ» պատվաստանյութի 50 հազար դեղաչափ: Այս մասին այսօր «AstraZeneca» պատվաստանյութով պատվաստվելուց հետո ասաց առողջապահության նախարար Անահիտ Ավանեսյանը: Ըստ նախարարի՝ նոր պատվաստանյութը ևս հասանելի կլինի 18-ից բարձր տարիքի բոլոր քաղաքացիների համար, ովքեր ցանկանում են պատվաստվել կորոնավիրուսային հիվանդության դեմ:
«Մյուս շաբաթ ձեռք կբերենք չինական պատվաստանյութի 100.000 դեղաչափ, որը նախատեսված է 50 հազար մարդու համար»,- ասաց Անահիտ Ավանեսյանը:
Պատասխանելով մեր այն հարցին՝ որքան գումար է հատկացվել՝ չինական արտադրության պատվաստանյութը ձեռք բերելու համար, նախարարը նշեց, որ այն Հայաստանին տրամադրվել է անվճար:
«Այդ պատվաստանյութը մեզ նվեր է, մենք միայն կազմակերպել ենք դրա փոխադրումը Հայաստան»,- հավելեց նա:
Ավանեսյանի խոսքով՝ առաջիկայում «COVAX Facility» հարթակի միջոցով Հայաստաը ձեռք կբերի նաև Նովովաքս պատվաստանյութը:
