Առողջապահության համակարգն արդեն իսկ մշակել է լրացուցիչ միջոցառումների շրջանակ, որոնք օգնելու են նախընտրական քարոզարշավի ընթացքում համավարակի տարածման ռիսկերը նվազեցնելուն, չնայած զանգվածային հավաքները և կորոնավիրուսից պաշտպանվելու կանոնների անտեսումը, միանշանակ, ռիսկեր պարունակում են։ Այս մասին լրագրողների հետ զրույցում ասաց Առողջապահության նախարար Անահիտ Ավանեսյանը։
Նախարարը շեշտեց՝ եթե այս ընթացքում կորոնավիրուսի դեմ պատվաստումները կանոնավոր բնույթ կրեն, ապա քաղաքացիները ընտրություններին ավելի պաշտպանված կմասնակցեն։
Ավանեսյանը կարևորեց կորոնավիրուսի դեմ պատվաստումները, որոնք հնարավորություն կտան ձերբազատվելու սահմանափակումներից և վերադառնալու բնականոն կյանք։ Նա ցավով նշեց, որ մահվան թվերը հատել են 4000-ի սահմանը, որն աղետալի իրավիճակ է։ Նախարարի կարծիքով՝ օր առաջ պետք է ընդլայնվեն պատվաստումների քանակը, որովհետև առողջությունը պաշտպանելու միակ միջոցը զանգվածային պատվաստումներն են։
Նախարարը ընդգծեց՝ կա համավարակի դեմ պայքարելու արդյունավետ միջոց, ուստի պետք է չտրվել մանիպուլյացիաների և օգտվել այդ հնարավորությունից, քանզի բժշկական համայքը նույնպես հոգնել է. արդեն մեկ տարի՝ օր ու գիշեր, մեր բժիշկները պայքար են մղում մարդկային կյանքեր փրկելու համար։
Քրիստինե Հովսեփյան
