Արցախի անվտանգության նախկին քարտուղար, Պաշտպանության բանակի նախկին հրամանատար Սամվել Բաբայանը, օրերս լրագրողների հետ զրույցում, անդրադառնալով առաջին նախագահ Լեւոն Տեր-Պետրոսյանի այն մտքին, թե մենք ոչ թե Ադրբեջանին ենք պարտվել վերջին պատերազմում, այլ ոչմիթիզականությանը, ասաց.
«Հիմա կարելի է հետ գնալ, ասել՝ ես ճիշտ էի այն ժամանակ եւ այլն: Ես ասում եմ՝ չէ՛, կներե՛ք, երկու կողմդ էլ սխալ եք: Ասեմ ինչի. եթե դուք զենք առնեիք, բանակը պատրաստեիք, էս վիճակը չէր լինի: Հիմա ոչ մի բան չեք արել, նստել եք թախտին, սպասել բախտին, եկել-պարտվել, ասում եք՝ հիշո՞ւմ եք՝ ես ասում էի. տենց կարող եմ ես էլ շատ բան ասել:
Ես էլ առաջին նախագահին հարգելով ասում եմ. պարո՛ն նախագահ, 92 թվականին ամբողջ ազգով հրապարակում՝ ընդդիմությունն էլ հետը, քեզ ասում էին, որ դու էդ տարածքները՝ Շահումյան, Մարտակերտ, պայմանավորվել ես հանձնել, հավատայի՞նք: Խի՞, որովհետեւ չէինք կարողանում կռվեինք, պատրաստ չէինք: Հենց փոխեցինք իրավիճակը, զարգացանք, գնացինք առաջ, բոլորն ասացին՝ հաղթած նախագահ է՝ մոռանալով իրականությունը: Հիմա էլ է նույնը, չեք կարողացել կազմակերպել, չեք կարողացել խնդիր լուծել, բերաններդ փակեք: Ատամներդ սեղմի, պատրաստի քո բանակը՝ քո երկրի պաշտպանության համար: Ավելորդ խոսակցությունը անիմաստ է»:
