Հայաստանում պետական կառավարման համակարգում նախորդ տարի բաժանվել է 22 մլրդ դրամի պարգևավճար՝ ներառյալ հարկերը. ԱԺ-ում հայտարարեց «Իմ քայլը» խմբակցության պատգամավոր Բաբկեն Թունյանը: Ըստ նրա՝ ներկայացված թվերը, թե պետական պաշտոնյաները 2020-ին ստացել են մոտ 120 մլն դոլարի պարգևավճարներ, սուտ է։
«2020 թվականին պետական կառավարման համակարգի աշխատավարձի ֆոնդը կազմել է 65.5 մլրդ դրամ, և բաժանվել է դրա մոտ 30 տոկոսի չափով՝ 22 մլրդ դրամի պարգևավճար, այսինքն՝ 45 մլն դոլար: Ընդ որում՝ այս գումարում ներառված են նաև հարկերը, դրանք հանելու դեպքում ստացվում է մոտ 35 մլն դոլար: Ընդ որում՝ այս գումարը բաժանվել է ոչ թե պետական բարձրաստիճան պաշտոնյաների, այլ 20 հազար պետական ծառայողների»,- ասաց Թունյանը՝ ներկայացնելով ֆինանսների նախարարությունից ստացված թվերը։
Բաբկեն Թունյանը նշեց, որ մեկ աշխատողի հաշվով նայելով կարելի է տեսնել, որ յուրաքանչյուր աշխատողի՝ պետական ծառայողի՝ սկսած գրադարանների, արխիվների, այլ կառույցների աշխատողներից, ամսական միջինը 90 հազար դրամ պարգևավճար է բաժին ընկել, եթե հարկերը հանվեն՝ մոտ 70 հազար դրամ:
