ԱԺ «Իմ քայլը» խմբակցության ղեկավար Լիլիթ Մակունցն իր ելույթում անդրադարձավ «Լուսավոր Հայաստան» խմբակցության ղեկավար Էդմոն Մարուքյանի՝ համերաշխության և համախմբման համատեքստում արած շեշտադրումներին:
«Հենց համերաշխության և համախմբման համատեքստում են առաջիկա արտահերթ խորհրդարանական ընտրությունների նախաձեռնումը հենց իշխանության կողմից»,- ասաց Մակունցը: Նա նշեց, թե պատերազմից հետո իշխանությունը յոթ ամիս լռել է: «Ոչ թե այն պատճառով, որ ցավով կիսվելու անհրաժեշտություն չկար, այլ, ի տարբերություն շատերի, մտորելու, հասկանալու, վերլուծելու և առաջիկա քայլերը մշակելու անհրաժեշտություն կար»,- ասաց նա:
Մակունցի խոսքով՝ վերջին յոթ ամսում այնպիսի մթնոլորտ է գեներացվում, որ դրանց չանդրադառնալն անհնար է: «Սադիզմի յուրահատուկ դրսևորում է զոհերի թիվն ավելացնելը: Սադիզմի յուրահատուկ դրսևորում է զինվորների աճյունների մասին խոսել այնպիսի ձևակերպումներով, որ ուղղակի անհասկանալի է, և րոպե անգամ չմտածել՝ հարազատներն ինչ են զգում այն պահին, երբ իրենք քաղաքական նպատակներով անում են որոշ արտահայտություններ»,- ասաց Մակունցը:
