«Ինձ որեւէ մեկը առաջարկ չի արել, նման խոսակցություն անգամ չի եղել»,-«Իրավունքի» հետ զրույցում անդրադառնալով ՊՆ նախարարի պաշտոնում նշանակվելու մասին լուրերին, ասաց Արցախի անվտանգության խորհրդի նախկին քարտուղար Սամվել Բաբայանը:
-Հատկանշական է, որ նման առաջարկով ֆլեշմոբ են սկսել նաեւ Ձեր կողմնակիցները:
– Ես անկեղծ տեղյակ չեմ, թե ովքեր են շահագրգռված եւ ինչքանով են անկեղծ` դրանից էլ տեղյակ չեմ: Արցախցիների մեծ մասի ցանկությունն է դա, բայց ցանկությունը մեկ բան է, առաջարկ ստանալը լրիվ այլ: Այս պահին նման առաջարկ չի եղել:
-Եթե նման առաջարկ այնուամենայնիվ լինի` կընդուն՞եք:
-Եթե կլինի` կմտածեմ:
-Պարոն Բաբայան, խնդրում էինք նաեւ Ձեր դիտարկում Արցախի նախագահ Արայիկ Հարությունյանի հրաժարականի պահանջի հետ կապված:
-Ես դա սխալ եմ համարում եւ դրա մասին ես կբարձրաձայնեմ վաղը:Արայիկ Հարությունյանի հրաժարականի դեպքում Արցախում քաոս կսկսվի:
-Պարոն Բաբայան, ինչո՞ւ մեր ԶՈՒ համարժեք պատասխան տալով` հետ չշպրտեց թշնամուն, երբ նոր-նոր էր փորձում սողոսկել դեպի Սեւ լիճ:
– Հայաստանը բանակ չունի, պետք է բանակ ունենանք, քանի չենք հասել դրան` թշնամին հա էլ ոտնձգություններ է անելու:
-Այսօր մենք բանակ չունեն՞ք ըստ Ձեզ:
-Ես դա բազմիցս եմ ասել:
