Սյունիքի խնդիրը մտցված է աշխարհաքաղաքական օրակարգ, և սա ակնհայտ է․ Դավիթ Բաբայան

-Պարոն Բաբայան, Արցախի ԱԳՆ-ն խստորեն դատապարտեց Ադրբեջանում հավատարմագրված դիվանագետների այցի կազմակերպումը Շուշի: Կա՞ր ակնկալիք, որ նման կոշտ արձագանք պետք է լիներ նաև Հայաստանի ԱԳՆ-ի կողմից:

-Ես չեմ ուզում նման հարցերի մասին խոսել: Դա Հայաստանի ներքին քաղաքականությունն է: Ճիշտ կլինի, եթե համապատասխան գերատեսչություններից հարցնեք: Ճիշտ չի լինի, եթե Հայաստանն ու Արցախը հակադրվեն: Մենք մեր դիրքորոշումը հայտնել ենք, դա մեր պարտքն է, մնացածը արդեն ճշտեք Հայաստանի պատկան մարմիններից: Դա ավելի ճիշտ կլինի, որովհետև Արցախի ԱԳՆ-ն չի կարող Հայաստանի ԱԳՆ անունից ինչ-որ բաներ ասի:

-Ինչպե՞ս եք գնահատում, որ այն երկրների դեսպաններին, որոնց դիվանագետները այցելել են Արցախի օկուպացված տարածքներ, հրավիրվել են ԱԳՆ:

-Դա շատ կարևոր է, որ Հայաստանի դիրքորոշումը հստակ հայտնել են: Տեսնենք, թե ինչպիսի զարգացում է այն ունենալու և ինչպիսի քայլեր են հետագայում ձեռնարկելու այդ երկրներն իրենց սխալներն ուղղելու ուղղությամբ:

-Փաստացի, պատերազմի մեջ գտնվող Հայաստանն այսօր ԱԳ նախարար չունի: Ինչպե՞ս եք սա գնահատում:

-Ես այդպիսի հարցերի չեմ ցանկանում պատասխանել: Արցախը պետք չի դարձնել ներքաղաքական շահարկումների առարկա:

-Դեսպանների Շուշի այցից հետո ինչպիսի՞ն պետք է լինեն Հայաստանի հարաբերություններն արտաքին աշխարհի հետ: Օրինակ, նույն Չինաստանի հետ, որի դեսպանը ևս այցելել էր Շուշի:

-Քանի որ ես Չինաստանի հետ առնչվել եմ, երկար տարիներ ուսումնասիրել եմ այդ երկրի պատմությունը, ապա պետք է աասեմ, որ երևի Չինաստանն այն բացառիկ երկրներից է, միգուցե Իրանի հետ մեկտեղ, որոնք այցելել են Շուշի ոչ թե նրա համար, որ իրենց աջակցությունը ցույց տան Ադրբեջանին, այլ որովհետև շատ կարևոր է իրենց համար իրավիճակը ճիշտ պատկերացնելը: Այս երկու երկրի մասին այսքանը կարող եմ ասել: Մնացած երկրների դեպքում ավելի մեծ հարցեր ունենք և ավելի մեծ վերապահումներ:

-ԵԱՀԿ Մինսկի համանախագահ երկրների դեսպանները հրաժարվեցին Շուշի այցելությունից: Իսկ մնացած երկրների քայլն ինչպե՞ս եք գնահատում, սա Ադրբեջանի լավ լոբբինգի արդյո՞ւնք էր: Դրանով ի՞նչ ցույց տվեց Բաքուն:

-Դա շատ սխալ քայլ էր մնացած երկրների կողմից: Դա մեծ հարված էր միջազգային մարդասիրական իրավունքին, մարդասիրության նորմերին, նաև իրենց վարկանիշին: Սա լոբբինգի հարց չէ: Այստեղ այլ խնդիր է. այդ երկրները ցանկացել են նման քայլի դիմել, դրա համար դիմել են: Չեմ կարծում, թե լոբբինգը վճռորոշ դերակատարություն է ունեցել; Եթե իրենց շահերից այդպես է բխում, Աստված իրենց հետ, մենք էլ համապատասխանաբար հետևություններ պետք է անենք, ուրիշ ոչինչ: Եվ պետք է շատ սառնասրտորեն մոտենալ դրան: Սա ինչ-որ տեղ սթափվելու հնարավորություն է, ավելի ճիշտ պատկերացնելու աշխարհաքաղաքականությունը, տարբեր երկրների շահերը և այլն:

«Առաջին լրատվական»-ի հարցերին պատասխանել է Արցախի ԱԳ նախարար Դավիթ Բաբայանը