Կաղարծիում բնակելի տուն է այրվել. ներսում հայտնաբերվել է տարեց տանտիրուհու դին

Նոյեմբերի 3-ին՝ ժամը 21:16-ին, Արցախի Մարտունու շրջանային արտակարգ իրավիճակների բաժնում տեղեկություն է ստացվել Մարտունու շրջանի Կաղարծի համայնքի տարածքում բռնկված հրդեհի մասին:

Նախնական տվյալներով՝ այրվում է բնակելի տուն, որի ներսում գտնվում է տարեց կին:

Արցախի ՆԳՆ արտակարգ իրավիճակների պետական ծառայությունից հայտնում են, որ բնակչությանն օգնելու և հրդեհը մեկուսացնելու նպատակով անմիջապես կանչի վայր է մեկնել Մարտունու շրաջանային արտակարգ իրավիճակների բաժնի հրշեջ փրկարարական մասի 2 մարտական հաշվարկ:

Հրդեհաշիջմանն օգնել են Կաղարծի համայնքից 5 բնակիչ: Հրդեհը մեկուսացվել է ժամը 22:50-ին, մարվել՝ ժամը 00:30-ին:

Այրվել է Մարտունու շրջանի Կաղարծի համայնքի բնակիչ Ն. Գ.-ին պատկանող երկհարկանի բնակելի տունը լրիվությամբ, որի ներսում հայտնաբերվել է նրա դին:

Դեպքի առթիվ ստուգումներ է իրականացնում ծառայության պետական հրդեհային և տեխնիկական անվտանգության տեսչությունը: