Եվրոպական դեղերի գործակալությունը կընդունի ռուսական արտադրության «Սպուտնիկ Վի» պատվաստանյութը Առողջապահության համաշխարհային կազմակերպության կողմից ընդունվելուց հետո միայն:
Այս կարծիքին է Ռուսաստանի «Գամալեյայի անվան համաճարակաբանության և մանրէաբանության գիտահետազոտական կենտրոնի» գիտնական Անատոլի Ալտշտեյինը:
«Եթե առողջապահության համաշխարհային կազմակերպությունը մինչև այս տարվա վերջ հաստատի «Սպուտնիկ Վի» պատվաստանյութը, ապա կհաստատի նաև Եվրոպական դեղերի գործակալությունը: Պատվաստանյութի ընդունման կարգի երկարաձգումը կապված է ռուսական դեղամիջոցի արտադրության տարբեր ստանդարտների հետ»,- ռուսական «Իզվեստիային» տված հարցազրույցում հայտնել է նա:
Նրա խոսքով՝ պատվաստանյութերն այժմ արտադրվում են «լավ արտադրական պրակտիկայի» համաձայն (GMP, Good Manufacturing Practice), և այս պահին ԱՀԿ-ի ներկայացուցիչները համոզվում են, որ այդ չափանիշները կպահպանվեն գործարաններում, ինչպես նաև մեկնաբանություններ են անում գործընթացի վերաբերյալ։
Հոկտեմբեր ամսվա սկզբում Ռուսաստանի Դաշնության առողջապահության նախարար Միխայիլ Մուրաշկոն հայտարարեց, որ Ժնևում հանդիպելով ԱՄՆ ներկայացուցիչների հետ՝ հստակեցրել են, որ «Սպուտնիկ Վի» պատվաստանյութն ընդունելու համար որևէ արգելք չկա. մնացել են միայն մի քանի ադմինիստրատիվ հարցեր, ասել էր նա: Ավելի ուշ ռուսական կողմը հայտարարել էր՝ ԱՀԿ-ն «Սպուտնիկ»-ը կընդունի մոտակա մի քանի ամիսների ընթացքում:
«Սպուտնիկ Վի»-ն ընդունված է 71 երկրներում, որոնք ունեն 4 միլիարդից ավելի բնակչություն: Դրա արդյունավետությունը կազմում է 97,6 տոկոս:
