Հայտնի են «Տաթև» կրթահամալիրի լաբորատոր փորձաքննության արդյունքները

«Տաթև» կրթահամալիրում իրականացված լաբորատոր փորձաքննության արդյունքներով՝ անհամապատասխանություն (ստաֆիլակոկ) է հայտնաբերվել հավի մսով, սոխարածով և գազարով խճողակում:

Այս մասին հաղորդագրություն է տարածել ՀՀ ՍԱՏՄ իրազեկման, խորհրդատվության և հանրության հետ տարվող աշխատանքների բաժինը, որում ասված է.

«Նոյեմբերի 23-ի, երեկոյան ՀՀ սննդամթերքի անվտանգության տեսչական մարմնի թեժ գծին ահազանգ էր ստացվել այն մասին, որ «Տաթև» կրթահամալիրի 10 սաների մոտ նկատվել են աղիքային վարակին բնորոշ ախտանշաններ՝ սրտխառնոց, փսխումներ։ Արդյունքում հոսպիտալացվել էր 4 երեխա:

Կրթահամալիրում ՍԱՏՄ տեսուչների իրականացրած վերահսկողական միջոցառումների ընթացքում, լաբորատոր հետազոտության նպատակով, նմուշներ էին վերցվել ինչպես առկա սննդամթերքից, այնպես էլ ուտեստների համար օգտագործված հումքից։

Լաբորատոր փորձաքննության արդյունքներով՝ անհամապատասխանություն (ստաֆիլակոկ) է հայտնաբերվել միայն հավի մսով, սոխարածով և գազարով խճողակում, իսկ հումք հանդիսացող սննդամթերքում անհամապատասխանություններ չեն հայտնաբերվել»:

Հիշեցնենք, որ նոյեմբերի 23-ին, ժամը 21։20-ին Ինֆեկցիոն հիվանդությունների ազգային կենտրոն էին դիմել նշված կրթահամալիրի 2 երեխա, որոնք հոսպիտալացվել էին։ Եվս 2 երեխա հոսպիտալացվել էր «Մուրացան» հիվանդանոցային համալիրում։