Մենք իրանական 0 մեքենա ենք կորցնում, որովհետև բոլոր մեքենաները մուտք են գործում ՀՀ սահման Մեղրի անցակետով. Ռ․ Բադասյան

«Եթե տեսական հնարավորություն կա, ուրեմն պետք է մաքսային վերահսկողությունն իրականացվի: Հիմա դա կիրականացվի մաքսային մարմնի կողմից, թե մենք ինչ-որ փուլում կպատվիրակենք այլ մարմնի ճանապարհի այդ հատվածում՝ ցույց կտա ժամանակը»,- այսօր՝ հունվարի 19-ին, լրագրողների հետ ճեպազրույցում ասաց ՊԵԿ նախագահ Ռուստամ Բադասյանը:

Նրա խոսքով՝ Տաթևի նորակառույց ճանապարհով նորմալ երթևեկում են և, նրա կարծիքով, շատ գոհ են այլընտրանքային այդ ճանապարհից. «Արձանագրվում են նաև որոշ խնդիրներ, որոնք մենք մեր իրանցի գործընկերոջ հետ հնարավորություն ունենք քննարկելու: Ես երեք անգամ երթևեկել եմ այդ ճանապարհով և երեք անգամ էլ համոզվել եմ, որ բեռնատարները, ընդ որում՝ ամենամեծ ծավալ ունեցող բեռնատարները, անցնում են այդ ճանապարհով, և եթե հետևեք ՏԿԵ քաղաքականությանը՝ խոսվում է նաև նոր ճանապարհի մասին, որը կմիանա, և այդ ոլորաններն ընդհանրապես կշրջանցվեն միանգամից Լծան գյուղի մոտ»: 

Ռուստամ Բադասյանը նշեց, որ հայկական կողմը իրանական 0 մեքենա է կորցնում. «Որովհետև բոլոր մեքենաները մուտք են գործում ՀՀ սահման Մեղրի անցակետով»:  Լրագրողի դիտարկմանը՝ փաստորեն իրենք են գումար կորցնում, եթե նախընտրում են ադրբեջանական հատվածով անցնել, Բադասյանը դրական պատասխան տվեց:

Լրագրողի հարցին՝ 1 մլն-ի արտահանման դեպքում, ինչպես ասվեց Կառավարության նիստում, մաքսատուրքեր չեն գանձվելու, արդյոք դա ձևական բնույթ չի՞ կրում, քանի՞ տնտեսվարող է օգտվելու դրանից, Ռուստամ Բադասյանը պարզաբանեց. «Սա արտահանման վրա դրված մաքսատուրք չէ: Քանի որ աշխարհում փոստային առաքանիների համակարգը լայն զարգացում է ստանում, և հաճախ արտահանվում է ապրանք մեկ առաքանիով, որպեսզի արտոնությունները կիրառելի լինեն ավելի լայն շրջանակի նկատմամբ: Չեմ կարծում, որ արհեստական է, որովհետև մինչև 200 եվրոյի մասով մենք սահմանել ենք բացառություն, որից օգտվում են»: