Վայրի բնության և մշակութային արժեքների պահպանման հիմնադրամը և (FPWC) Երևանի կենդանաբանական այգին օգնություն են տրամադրել Արարատի մարզի Հովտաշեն համայնքում վնասված արագիլներին։ Մասնագետների պնդմամբ, բազմաթիվ արագիլներ աղտոտվել են դեռևս անհայտ պայմաններում արտանետված նյութերով, ինչը թռչուններին զրկել է թռչելու և սնվելու բնական կարողությունից՝ կասկածի տակ դնելով նրանց հետագա գոյությունը։
Ուստի, Վայրի բնության և մշակութային արժեքների պահպանման հիմնադրամը (FPWC) և Երևանի կենդանաբանական այգին վնասված արագիլներին այսօր ցուցաբերել են անհրաժեշտ առաջնային օգնություն, այդ թվում՝ ապահովելով կենդանիներին սնունդով։ Մասնագետն այցելել է Հովտաշեն համայնք, զննել վնասված կենդանիներին, տրամադրել անհրաժեշտ բուժօգնություն և սնունդ: Գործընթացը կլինի շարունակական և կենդանիներին կտրամադրվի օգնություն, սակայն ընդգծենք, որ խնդիրը բավականին լուրջ է և կա հավանականություն, որ արագիլները չեն փրկվի։
Միաժամանակ, հորդորում ենք ՀՀ բոլոր քաղաքացիներին, տնտեսվարող սուբյեկտներին առավել ուշադիր և խնամքով վերաբերվել շրջակա միջավայրին, քանի որ բնական էկոհամակարգի խաթարումը կարող է հանգեցնել նման անկանխատեսելի հետևանքների, իսկ պետական լիազոր մարմիններին՝ հայտնաբերել մեղավորներին և օրենքով սահմանված եղանակով ենթարկել պատասխանատվության։
Վայրի բնության և մշակութային արժեքների պահպանման հիմնադրամ և (FPWC)
