Մոլդովայում արտակարգ դրություն կմտցվի ռուսական գազի մատակարարումների դադարեցման սպառնալիքի պատճառով, հայտնում է Deutsche Welle-ն։ Այս որոշումն ընդունել է երկրի խորհրդարանը դեկտեմբերի 12-ի լույս 13-ի գիշերը։ Այն պաշտպանել են 101 պատգամավորներից 56-ը։ Մոլդովայում արտակարգ դրությունը կմտցվի դեկտեմբերի 16-ից՝ 60 օրով։ Սպասվում է, որ Ռուսաստանից գազը երկիր կդադարի 2025 թվականի հունվարի 1-ից։

ՍԱՏՄ-ն ստուգումներ է իրականացնում «ԳՈՒՄ»-ի շուկայում: Սանիտարական նորմերի խախտումների՝ ոչ սպանդանոցային միս վաճառելու համար փակում են մսի կետերը, ինչը դժգոհության ալիք է առաջացրել «ԳՈՒՄ»-ի շուկայի մսավաճառների մոտ։ Նրանք բողոքի ակցիա են իրականացնում. իրավիճակը լարված է։ Տեղում նաև իրավապահներն են. կան ոստիկանություն բերման ենթարկվածներ։ Բողոքի ակցիայի մասնակիցներից մեկը փորձել է ինքնահրկիզվել։ Նրան ևս տարել են ոստիկանություն։

ՀՀ վարչապետ Նիկոլ Փաշինյանը մեկնել է Ռուսաստանի Դաշնություն։ Այսօր Մոսկվայում վարչապետ Փաշինյանի նախագահությամբ տեղի է ունենալու Եվրասիական միջկառավարական խորհրդի հերթական նիստը:

2 տարի առաջ այս օրը` դեկտեմբերի 12-ին, մեկնարկեց Արցախի նկատմամբ ագրեսիայի հանգրվանային փուլը, գրում է ՀՀ ԱԺ պատգամավոր Տիգրան Աբրահամյանը։ «Ադրբեջանական հատուկ ծառայությունները, բնապահպան ցուցարարների անվան տակ, փակեցին Հայաստանն Արցախին կապող միջանցքը. մի գործողություն, որը հակասում էր 2020 թվականի նոյեմբերի 9-ի տխրահռչակ եռակողմ փաստաթղթին: Այս քայլով, ըստ էության, սկիզբ դրվեց Արցախի դեմ լայնածավալ ագրեսիային, որի […]

ԵՄ դիտորդական առաքելությունը նշել է սահմանամերձ շրջաններում 4000-րդ պարեկությունը։ «Մենք հպարտ ենք տեղում դիտելու և զեկուցելու իրադրությունը՝ հավատարիմ մնալով տարածաշրջանում խաղաղությանն աջակցելուն»,- ասված է առաքելության հաղորդագրությունում:

Դեկտեմբերի 12-ին ՀՀ պաշտպանության նախարար Սուրեն Պապիկյանն ընդունել է ՀՀ-ում Ֆրանսիայի արտակարգ և լիազոր դեսպան Օլիվիե Դըկոտինյիին: Հանդիպման ընթացքում քննարկվել են պաշտպանության բնագավառում Հայաստան-Ֆրանսիա համագործակցության օրակարգային հարցերն ու առաջիկա անելիքները: Կարծիքներ են փոխանակվել տարածաշրջանային և միջազգային վերջին զարգացումների շուրջ:

ՀՀ ԱԱԾ-ն տվյալներ է ստացել դեկտեմբերի 11-ին՝ ժամը 03:20-ի սահմաններում, Հայաստանի Հանրապետության և Թուրքիայի Հանրապետության պետական սահմանի Արարատի մարզի Ռանչպար բնակավայրի հատվածում ՀՀ պետական սահմանի ապօրինի հատման հավանական փորձի վերաբերյալ։ «Այն ստուգելու կապակցությամբ իրականացվում են անհրաժեշտ օպերատիվ-հետախուզական միջոցառումներ»,- ասվում է հաղորդագրությունում: