Արդեն հայտնի է, որ այս տարի Հայաստանը առաջին անգամ իր պատմության մեջ կհյուրընկալի բռնցքամարտի Եվրոպայի առաջնությունը, որը տեղի կունենա Կարեն Դեմիրճյանի անվան մարզահամերգային համալիրում մայիսի 21-31-ը։
Բացման պաշտոնական արարողությունը կկայանա մայիսի 22-ին: Երևանում առաջնության օրերին կգործի երկու ֆան գոտի, որոնցից մեկը կլինի քաղաքի կենտրոնում` Կարապի լճի հարևանությամբ, մյուսը Հյուսիսային պողոտայում։
Եվրոպական ֆեդերացիայի ղեկավարների Երևան ժամանելուց հետո, այսօր տեղի ունեցավ առաջնության մամուլի ասուլիսը, որին կազմակերպիչները ներկայացրել են կատարված աշխատանքաները։ Ասուլիսին ներկա էին վարչապետի աշխատակազմի ղեակավար, Եվրոպայի առաջնության կազմկոմիտեի նախագահ Արայիկ Հարությունյանը, ԿԳՄՍ փոխնախարար Կարեն Գիլոյանը, Հայաստանի բռնցքամարտի ֆեդերացիայի նախագահ Հովհաննես Հովսեփյանը, բռնցքամարտի Եվրոպական կոնֆեդերացիայի գործադիր տնօրեն Ալեքսեյ Եգորովը, մենեջեր Դրագոլյուբ Րադովիչը և տեխնիկական պատվիրակ Ադամ Կոշիրը։
Արայիկ Հարությունյանը նշեց, որ այս առաջնությունը մեր պետության ռազմավարության կարևոր ուղղություններից մեկն է և պետք է խթանել սպորտը։
ԿԳՄՍ փոխնախարար Կարեն Գիլոյանն էլ շեշտեց, որ վերջապես Հայաստանն աշխարհի սպորտային քարտեզում իր կայուն տեղը կունենա։ Վերջինս կոչ անելով դիմեց հայ երկրպագուններին լինեն հավաքականի կողքին։
ՀԲՖ նախագահ Հովհաննես Հովսեփյանը միանալով գործընկերների խոսքերին շեշտեց, որ այս առաջնությունը կարևոր է և պետք է ցույց տալ մեր ներկան և ապագան։
Բռնցքամարտի Եվրոպական կոնֆեդերացիայի գործադիր տնօրեն Ալեքսեյ Եգորովն էլ իր հերթին ասաց, որ ուրախ է նման միջոցառման անցկացմանը Երևանում։
Բռնցքամարտի Եվրոպական կոնֆեդերացիայի մենեջեր Դրագոլյուբ Րադովիչն էլ զգում է իրեն ինչպես տանը և հույս ունի, որ հյուրերն էլ նույնը կզգան։
Մինչ այս առաջնությանը ներկայացվել է 30-40 երկրի հայտ, հնարավոր է, որ Ադրբեջանը նույնպես կմասնակցի։ Առաջնությանն ընդհանուր առմամբ կմասնակցի մոտ 280 մարզիկ:
Նշենք, որ Եվրոպայի առաջնության ընդհանուր մրցանակային ֆոնդը կազմում է 260 հազար դոլար: Մուտքը լինելու է տոմսերով:
