Այս անգամ Ձեզ կպատմենք Սիդնեյի օպերային թատրոնի մասին։ Այս թատրոնի շենքն ամենահայտնին է Ավստրալիայում և ամենաճանաչվածն աշխարհում։ Նրա հետ լուսանկարներն ամենից հաճախ հրապարակվում են, երբ խոսքը Սիդնեյի մասին է։ Այսօր դա քաղաքի նշանավոր խորհրդանշանն է, որն, ի դեպ, աշխարհի յոթ նոր հրաշալիքների նախագծի 20 եզրափակիչ փուլ անցածներից մեկն է։
Թատրոնի շենքը նման է բարձրացված առագաստներով նավի։ Պատահական չէ, որ ճարտարապետները դրան նման տեսք են տվել. ավելի վաղ այս վայրում եղել է նավահանգիստ՝ ամրոցով։ 1973 թվականին այս թատրոնը բացել է անձամբ Եղիսաբեթ II թագուհին։
Թատրոնի կառուցումը տևել է 14 տարի և Ավստրալիային արժեցել է մոտ 102 միլիոն դոլար: Ի սկզբանե նախատեսվում էր նախագիծն ավարտել 4 տարում, սակայն ներքին աշխատանքների հետ կապված դժվարությունների պատճառով բացման ժամկետը զգալիորեն հետաձգվեց։ Նորմալ աշխատանքի համար թատրոնին անհրաժեշտ է այնքան էլեկտրաէներգիա, որքան կբավարարի 25000 բնակչություն ունեցող քաղաքի համար։ Այս եզակի համալիրի կառուցման համար Սիդնեյի նավահանգստի օվկիանոսի հատակը 25 մետր խորությամբ կույտեր են լցվել: Տանիքի ծածկը բաղկացած է 1.056.006 սպիտակ սալիկներից և անփայլ կրեմագույն սալիկներից։
Թատրոնն ունի 5 տարբեր չափերի դահլիճ։ Համոզվեք, որ այցելեք Օպերայի դահլիճը, որտեղ գտնվում է աշխարհի ամենամեծ թատերական վարագույրների գոբելենը՝ «Արևի վարագույրը»: Թատրոնը բաց է ամեն օր, բացառությամբ կաթոլիկ Սուրբ Ծննդյան և Ավագ ուրբաթ օրերի:
Աստղ Խաչատրյան
