Մարալիկի բնակիչները բողոքում են ՀՀԿ–ական ղեկավարից և պնդում, որ եթե նա շարունակի պաշտոնավարել, արյունահեղություն կլինի։ Sputnik Արմենիան լսել է մարալիկցիների բողոքն ու զրուցել համայնքի ղեկավարի հետ։
Հուլիսի 10-ին Մարալիկում բամբակամանվածքային ֆաբրիկայի վերագործարկման ժամանակ մի խումբ մարալիկցիներ եկել էին իրենց դժգոհությունը հայտնելու ՀՀ վարչապետ Նիկոլ Փաշինյանին։ Արդեն մոտ 1 տարի է` բնակիչները բողոքում են Անի համայնքի ղեկավար Արտակ Գևորգյանի անգործությունից։
2017-ին 17 համայնքների միավորման արդյունքում է ձևավորվել է Անի համայնքը, որի կենտրոնը Մարալիկն է։ Արտակ Գևորգյանը 2007 և 2011 թվականներին վերընտրվել է Մարալիկի քաղաքապետ, իսկ նախորդ տարի ընտրվել է խոշորացված Անի համայնքի ղեկավար։ Նա ՀՀԿ–ի անդամ է։
Մարալիկցիներին այդպես էլ չհաջողվեց մոտենալ վարչապետին։ Նրանք իրենց դժգոհությունը հայտնեցին լրագրողներին և ՀՀ ԱԺ պատգամավոր, Շիրակի նախկին մարզպետ Կարեն Սարուխանյանին:
«Հանրապետականին քշել ենք, Նիկոլին ենք ընտրել, բայց Մարալիկում հանրապետական կլան է՝ քեռի-եգյանով թալանում են Մարալիկը, հիմա էլ Մարալիկի ուսումնարանի շենքն են անասնագոմ սարքել»,- ասացին նրանք։
Բողոքի եկած մարալիկցիները պնդեցին՝ այս ընթացքում ոչինչ չի արվել համայնքը զարգացնելու համար, փոխարենը ՀՀԿ–ական ղեկավարն իր ու ազգականների խնդիրներն է լուծում և տևական ժամանակ է` «փախած» է. իմանալով, որ իրենց բողոքն արտահայտելու համար բնակիչները հերթապահում են համայնքապետարանի մուտքի մոտ, նա շրջիկ համայնքապետարան է ստեղծել ու այս համայնքից այն համայնքում է ավագանու նիստեր անցկացնում:
Նշենք, որ Անի համայնքի ղեկավարն իսկապես ներկա չէր ֆաբրիկայի վերագործարկման արարողությանը։
«Վարչապետը 6-րդ անգամ է գալիս, համայնքապետը չի դիմավորում, փախած է, չկա»,- նշեցին բնակիչները և զգուշացրին` եթե մինչև սեպտեմբերի 1-ը համայնքի ղեկավարը շարունակեց պաշտոնավարել, Մարալիկում արյունահեղություն կլինի:
Ավելին՝ armeniasputnik.am
