Ֆրանսիայի նախկին վարչապետ, Հավր քաղաքի քաղաքապետ Էդուարդ Ֆիլիպի գլխավորած պատվիրակության անդամները օրերս Սյունիք կատարած այցի ընթացքում եղան նաեւ Գորիսի ֆրանս-հայկական սրտանոթային կենտրոնում։
Կենտրոնի հիմնադիր տնօրեն Ավետիս Մատիկյանի եւ գործադիր տնօրեն Արտակ Ասոյանի ուղեկցությամբ նրանք ծանոթացան կենտրոնի աշխատանքին։
«Մեծապես տպավորված եմ կենտրոնով, այն ինչպես տեղեկացա, եզակի է Սյունիքի մարզում։ Ուրախ եմ, որ կենտրոնը ստեղծվել է Ֆրանսիայի տարածքային միավորումների եւ տարբեր կազմակերպությունների աջակցությամբ», -լրագրողների հետ ճեպազրույցում նշեց Էդուարդ Ֆիլիպը։
Ֆրանսիայի նախկին վարչապետը հավաստիացրեց, որ Ֆրանսիա վերադառնալուց հետո քաջալերելու է շատ համայնքների։ «Հայ-ֆրանսիական բարեկամությունը հենց դրանով է բնութագրվում, որ ոչ միայն Ֆրանսիայի կառավարությունն է ուղիղ աջակցում Հայաստանի կառավարությանը, այլ տարբեր նահանգների տեղական ինքնակառավարման մարմինները։ Պետք է կոչ անեմ, որ շարունակեն աջակցել, որ Սյունիքում եւ ոչ միայն այստեղ, նոր բժշկական կենտրոններ հիմնադրվեն»,-իր խոսքը եզրափակեց Էդուարդ Ֆիլիպը։
