«Պարոն Ավետիսյանն ասաց, որ այսպես դատախազության համակարգն ենք կազմաքանդում, որ անարդար մոտեցում է լինում պետական կառավարման համակարգի այլ ոլորտների հանդեպ։ Նախ արձանագրեմ, որ աշխատավարձերի ողջ համակարգի վերանայումն անհնար է։ Ֆինանսական ահռելի բեռ կլինի պետբյուջեի համար։ Կառավարության համար առաջնահերթություն համարվող ոլորտներում են լինում փոփոխություններ ու աշխատավարձի բարձրացում»,- ԱԺ 8-րդ գումարման 5-րդ նստաշրջանի հերթական նիստում այսօր արձագանքելով դատախազների աշխատավարձի բարձրացման առնչությամբ «Հայաստան» խմբակցության պատգամավոր Թադեւոս Ավետիսյանի հայտարարությանը՝ ասաց ՔՊ խմբակցության պատգամավոր Էդուարդ Աղաջանյանը։
Նա նշեց․ «Իսկ երբ խոսքը գնում է ճնշումների մասին, կուզեի մարդիկ պատկերացում կազմեն, որ խոսքն այնպիսի գործերի վերահսկողության մասին է, որոնք հարյուրավոր միլիարդ դրամների կոռուպցիոն ռիսկեր են պարունակում։ Ուստի նման գործեր քննող դատախազները պետք է պատշաճ եկամուտ ունենան։ Դա տրամաբանական է եւ բխում է նաեւ կառավարության հակակոռուպցիոն քաղաքականությունից։ Սա քաղաքական անձանց քիմքի հարցը չէ, պարոն Ավետիսյան, սա քաղաքացիների տված մանդատի շրջանակում արվող փոփոխություն է»։
