ՄԱԿ-ը չի կարող ստուգել այն պնդումները, որ Իրանը ստացել է մինչև 84% հարստացված ուրան և կոչ է անում Թեհրանին կատարել ՄԱԳԱՏԷ-ի հետ բոլոր պայմանավորվածությունները։ ՏԱՍՍ-ը հայտնում է, որ այդ մասին երեքշաբթի օրը կայացած ճեպազրույցում հայտարարել է համաշխարհային կազմակերպության գլխավոր քարտուղարի պաշտոնական ներկայացուցիչ Ստեֆան Դյուժարիկը։
«Մենք չենք կարող ստուգել այդ պնդումները: Մեր դիրքորոշումը մնում է անփոփոխ: Իրանը պետք է կատարի ՄԱԳԱՏԷ-ի և միջազգային գործընկերների հետ բոլոր պայմանավորվածությունները»,-ասել է ՄԱԿ-ի ներկայացուցիչը:
Ավելի վաղ Bloomberg-ը, հայտնել էր, որ Ատոմային էներգիայի միջազգային գործակալության տեսուչները, հերթական ստուգումից հետո պարզել են, որ Իրանը ստացել է մինչև 84% հարստացված ուրան։ Երկուշաբթի օրը Իրանի ատոմային էներգիայի կազմակերպության խոսնակ Բեհրուզ Քամալվանդին զեկույցն անվանել է կեղծիք և փաստերի խեղաթյուրում: Նրա խոսքով՝ Իրանը դեռ չի փորձել ուրանը 60%-ից բարձր հարստացնել ։
