Հանրապետության նախագահ Վահագն Խաչատուրյանն ուղերձ է հղել 2008 թվականի մարտի 1-ի իրադարձությունների կապակցությամբ, որում նշված է.
«Սիրելի հայրենակիցներ,
Հայաստանի Հանրապետության հարգելի քաղաքացիներ,
15 տարի առաջ՝ 2008 թվականի մարտի 1-ին Երևանի կենտրոնում օրվա իշխանություններն ապօրինի կերպով բիրտ ուժ կիրառեցին խաղաղ ցուցարարների նկատմամբ, ինչի հետևանքով Հայաստանի 10 քաղաքացիներ սպանվեցին:
Այս ողբերգական իրադարձությունը, սակայն, մեկ օրվա կամ մեկ ամսվա զարգացումների հետևանք չէր, այլ տարիներ շարունակ մեր երկրում տեղի ունեցած ընտրակեղծիքների, քաղաքական սպանությունների ու քաղաքական հալածանքների մթնոլորտի, պետական համակարգերում քրեաօլիգարխիկ և հանցավոր բարքերի արմատավորման գագաթնակետն էր:
2008 թվականի մարտի 1-ին օրվա իշխանության իրականացրած վայրագությունը դուրս էր մարդկային ողբերգության չափումներից և շատ ավելի լայն ընդգրկում ուներ: Այդ օրն արձակված կրակոցներն ուղղված էին մեր քաղաքացիների ազատ կամքի, նրանց անքակտելի իրավունքների և ժողովրդավարության հիմնարար սկզբունքների դեմ:
Մարտի 1-ի հանցագործությունը լուռ վկայությունն էր այն բանի, որ օրվա իշխանությունը ձախողել է ազատ, ժողովրդավար, կենսունակ քաղաքական համակարգի ու պետական ինստիտուտների ստեղծման կարևորագույն և պատասխանատու գործը, որովհետև բիրտ ուժի վրա հենված իշխանությունը չի կարող լինել հավաքական հանրության իղձերի ու համազգային նպատակների արտահայտողն ու իրականացնողը:
Սիրելի հայրենակիցներ,
Մարտիմեկյան ողբերգությունից հետո անցած 15 տարիների ընթացքում մեր պետությունն առերեսվեց ծանր փորձությունների, բայց ի պատիվ մեր քաղաքացիների, 2018 թվականի ոչ բռնի հեղափոխությունը եկավ ցույց տալու, որ Հայաստանը անշեղորեն շարժվում է դեպի ժողովրդավարություն, որը հակոտնյա է բռնության որևէ դրսևորման:
Անգամ 2020 թվականին ծանր պատերազմին հաջորդած քաղաքական զարգացումներն ու ընտրություններն ապացուցեցին, որ մեր քաղաքացիների ազատ կամարտահայտությունը, ժողովրդավարական սկզբունքների գերակայությունը վիճարկման առարկա չեն կարող լինել:
Հայաստանի Հանրապետության հարգելի քաղաքացիներ,
Այսօր ոգեկոչելով մարտի 1-ի անմեղ զոհերի հիշատակը մենք վերահաստատում ենք մեր կամքը՝ շարժվել Հայաստանն իրավունքի, ազատության և ժողովրդավարական արժեքների երկիր դարձնելու ուղիով, որտեղ բացառված կլինեն քաղաքացիների հանդեպ բռնությունն ու բռնության միջոցով հարցերի լուծումը»:
Վահագն Խաչատուրյանն այսօր մասնակցել է Մարտի 1-ի զոհերի հուշարձանի բացման արարողությանը և ծաղիկներ խոնարհել զոհվածների հիշատակին:
