«Հարցը սուր է ոչ միայն Շիրակում, այլեւ ողջ ՀՀ-ում։ Այն համայնքների տիրույթում է։ Բայց կան դժվարություններ։ Խոշորացման սկզբնական փուլում եղածին ավելանում էր ֆինանսական հարցը, բայց հիմա հարցն ավելի շատ կազմակերպչական է։
Ովքե՞ր պետք է դա իրականացնեն։ Շատ համայնքներ մրցույթներ են նախաձեռնել, որպեսզի ընկերությունները գործընթացն անեն (նկատի ունի՝ կազմակերպեն թափառող կենդանիների ստերջացումը,-հեղինակ), բայց համայնքների փորձը հիմնականում բացասական է»,- ազգային ժողով-կառավարություն հարցուպատասխանի ժամանակ այսօր ասաց տարածքային կառավարման եւ ենթակառուցվածքների նախարար Գնել Սանոսյանը՝ արձագանքելով ՔՊ խմբակցության պատգամավոր Կարեն Սարուխանյանի մտահոգությանը, որ Շիրակի մարզի բոլոր համայնքներում բնակիչները բարձրաձայնում են թափառող շների խնդիրը։
Գնել Սանոսյանը նշեց․ «Ցավոք, չկան մասնագիտացված կազմակերպություններ, որոնք կմասնակցեն մրցույթների եւ գործընթացը կիրականացնեն։ Մտածում ենք մարզային նշանակության կառույցներ ստեղծել, բայց իրավական խնդիր կա։ Բնապահպանական հարցեր էլ կան»։
