«Ռուսական խաղաղապահ զորակազմը մարտի 7-ի օրվա ընթացքում ուղեկցել է Հայաստանի զինված ուժերի ռազմական տրանսպորտային միջոցների և անօրինական զինված կազմավորումների տեղափոխմանը Լաչինի միջանցքին այլընտրանք գրունտային ճանապարհով դեպի Ղարաբաղ»։ Սա պնդում է Ադրբեջանի պաշտպանության նախարարությունը՝ հայտարարելով, թե «դա ֆիքսել են այդ ուղղությամբ տեղակայված ադրեջանական ստորաբաժանումների տեխնիկական դիտարկման միջոցները, և դա եռակողմ համաձայնությունների կոպիտ խախտում է, որը պետք է անհապաղ դադարեցվի»։
Մարտի 5-ի արյունալի դեպքի մասին ևս Բաքուն նմանատիպ հայտարարություն էր արել, հայկական կողմը դա հերքել էր։
«Բացարձակ իրականությանը չի համապատասխանում, նրանք էլ լավ գիտեն, որ այդ ճանապարհով անցնում էին պարզապես ոստիկանության ծառայողները իրենց ծառայությունն իրականացնելու նպատակով», – ասել էր Արցախի ՆԳՆ խոսնակ Հունան Թադևոսյանը։ Բացի ոստիկանների ծառայողական զենքից, որևէ այլ զենք-զինամթերք չի եղել մարդատար մեքենայում, իսկ տեսանյութում պարզ երևում է, որ «ՈՒԱԶ»-ը Ստեփանակերտից է ճանապարհվել դեպի ոստիկանական կետ. Ստեփանակերտից ադրբեջանական կողմի պնդումները հերքել են՝ որպես ապացույց կադրերով ներկայացնելով միջադեպի ամբողջ ողբերգական ընթացքը։
«Եթե այդ գործողությունները անմիջապես չդադարեցվեն, դա կանխելու համար ադրբեջանական կողմը ստիպված դիմելու է անհրաժեշտ միջոցների։ Այդ իրադարձությունները ևս մեկ անգամ հաստատում են Լաչինի ճանապարհին Ադրբեջանի կողմից համապատասխան անցակետ տեղադրելու անհրաժեշտությունը»,- այսօր կրկին հայտարարել է Ադրբեջանի ռազմական գերատեսչությունը։
