Երևան քաղաքի Արին բերդ կոչվող ճանապարհահատվածը, որն ավելի հայտնի է «Տեցի կռուգ» անվամբ, բավական տևական ժամանակ է ինչ գտնվում է անբարեկարգ վիճակում և խոչընդոտներ է առաջացնում վարորդների համար՝ երթևեկության ընթացքում։
Կապ հաստատեցինք Երևանի քաղաքապետարանի լրատվության վարչություն, որտեղից մեզ պատասխանեցին, որ․ «Ճանապարհի այդ հատվածը սեփական միջոցներով բարեկարգելու պարտավորություն էր ստանձնել մասնավոր ընկերություններից մեկը»։
Սակայն, թե կոնկրետ ո՞ր ընկերությունն է պարտավորություն ստանձնել՝ քաղաքապետարանից այս պահին դժվարացան պատասխանել։
Բարեկարգման աշխատանքների դանդաղելու պատճառը՝ ընթացքում նախագծային փոփոխություններն են եղել․ «Քանի որ այդ օղակաձև հատված ծանր և կցորդիչով մեքենաների համար մուտքը դժվարություն է առաջացրել՝ լայնացրել են և փոփոխության ենթարկել։ Ընթացակարգով բավականին երկար տևող պրոցես է՝ նոր նախագիծ, փորձաքննություն, նախագծի հաստատում դրա համար երկարել է»- պարզաբանեցին քաղաքապետարանից։
Քաղաքապետարանից վստահեցրին, որ ընդամենը հաշված օրերի ընթացքում այս հարցը կկարգավորվի․«Արին բերդի այդ հատվածի որոշակի դժվարանցանելի վիճակը ի վերջո կհանգուցալուծվի ու ավարտին կհասցվի, խոսքը մաքսիմում 10 օրվա մասին է։ Եղանակը կայունանա և վերջնական շտրիխները կարվեն ու այդ խնդիրը՝ այդ հատվածից ի սպառ կվերանա»։
Մերի Մանուկյան
