ԱՄՆ նախագահ Ջո Բայդենը իր նախորդ Դոնալդ Թրամփին մեղադրել է Silicon Valley-ի եւ Signature Bank-ի փլուզման մեջ։ Այս մասին նա ասել է Սպիտակ տանը իր ելույթի ժամանակ։
Միաժամանակ Բայդենը կարծում է, որ ամերիկացիները կարող են վստահ լինել երկրի բանկային համակարգի անվտանգության հարցում։ Նա նշել է, որ ԱՄՆ քաղաքացիները վնասներ չեն կրի Silicon Valley-ի եւ Signature Bank-ի հետ կապված իրավիճակի պատճառով։
Ավելի վաղ ամերիկյան CNN հեռուստաալիքը հայտնել էր, որ Silicon Valley Bank-ի (SVB) փլուզման հետեւանքները վերացնելու ԱՄՆ իշխանությունների փորձը չի կարողացել հանգստացնել ներդրողներին եւ համաշխարհային խուճապ է առաջացրել ֆինանսական շուկայում։
CNN-ը նշում է, որ չնայած HSBC-ի (FTRXX) կողմից SVB-ի բրիտանական մասնաճյուղը 1 ֆունտով գնելուն եւ այն հավաստիացումներին, որ հաճախորդները կկարողանան շարունակել բանկային գործարքները սովորական ռեժիմով, արժեթղթերը սկսել են նվազել վաղ առավոտյան սակարկումների ժամանակ:
Հաղորդագրության մեջ նշվում է, որ սակարկումների մեկնարկից հետո եվրոպական Euro Stoxx 600 ինդեքսն ընկել է 2,5%-ով, լոնդոնյան FTSE 100-ը՝ 2,2%-ով, իսկ Stoxx Europe 600 Banks-ը 2021 թվականի մարտից ի վեր առաջին անգամ էժանացել է 5%-ով:
Մինչ այս ԱՄՆ Դաշնային պահուստային համակարգը (ԴՊՀ) որոշել էր բանկերին լրացուցիչ միջոցներ տրամադրել ֆինանսական կայունությունը պահպանելու համար։
Նախօրեին ԱՄՆ ֆիննախը, Դաշնային պահուստային համակարգը եւ ԱՄՆ Ավանդների ապահովագրման դաշնային հանձնաժողովը համատեղ հայտարարությամբ SVB-ի բոլոր ավանդատուներին խոստացել էին երկուշաբթի օրվանից՝ մարտի 13-ից հասանելիություն ապահովել ավանդներին:
