ԼՂ բնակչության իրավունքները և անվտանգությունը երաշխավորելու համար պետք է ստեղծվեն միջազգային մեխանիզմներ։ Այս մասին լրագրողների հետ զրույցում նշեց ՆԱՏՕ-ի նախկին քարտուղար, Rasmussen Global միջազգային քաղաքական խորհրդատվական կազմակերպության հիմնադիր նախագահ Անդերս Ֆոգ Ռասմուսենը։
«Պետք է անենք ամեն ինչ, որպեսզի հասնենք տևական և արդար խաղաղության համաձայնագրի: Այդ համաձայնագրում շատ կարևոր տարր պետք է լինի ԼՂ բնակչության իրավունքների և անվտանգության երաշխիքը: Եվ այդ իրավունքները և անվտանգությունը երաշխավորելու համար մենք պետք է ունենանք միջազգային մեխանիզմներ, որոնք կմշտադիտարկեն, կվերահսկեն և կերաշխավորեն դրանք»,- նշեց նա:
Անդրադառնալով Հայաստան-ԵՄ հարաբերություններին՝ Ռասմուսենը նշեց, որ կցանկանային շատ սերտ համագործակցել ՀՀ կառավարության հետ:
«Դա լայն համագործակցություն կլինի, որը լայն թեմաների կանդրադառնա: Բնականաբար, խոսում ենք ԵՄ-ի կողմից քաղաքական աջակցության մասին: Կարծում եմ, որ հիմա շատ անհրաժեշտ է, որ մենք տեղեկացվածությունը բարձրացնենք, որ ԼՂ-ում կա հումանիտար ճգնաժամ: Եվ միջազգային հանրությունը պետք է առավելագույն ճնշում գործադրի Ադրբեջանի վրա, որ այս հարցը լուծվի»,- ասաց նա:
Նա ընդգծեց, որ ցանկանում են աջակցել ՀՀ կառավարությանը, որ էլ ավելի բարձր մակարդակի հասցվի ԵՄ-ի հետ երկխոսությունը, որը կներառի նաև անվտանգության քաղաքականության թեմայով երկխոսություն:
«ԵՄ-ն լայն գործիքակազմ ունի, որը կարող է օգտակար լինել Հայաստանին: Կարծում եմ, որ Հայաստանը միջազգային էլ ավելի շատ գործընկերների կարիք ունի, քան ունի այսօր»,- ասաց նա՝ նշելով, որ Հայաստանի հետ ռազմական համագործակցության եզրերը մանրամասն չեն քննարկվել:
