Նախագծի ընդունումը բխում է ՀՀ-ԵՄ համապարփակ և ընդլայնված գործընկերության համաձայնագրից, ինչպես նաև օրենքի կիրարկման արդյունքում ի հայտ եկած խնդիրներից. ԱԺ տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի մշտական հանձնաժողովի մարտի 15-ի նիստում ասել է ՀՀ շրջակա միջավայրի նախարար Հակոբ Սիմիդյանը:
Հանձնաժողովն առաջին ընթերցմամբ քննարկել է Կառավարության հեղինակած ««Շրջակա միջավայրի վրա ազդեցության գնահատման և փորձաքննության մասին» ՀՀ օրենքում փոփոխություն կատարելու մասին» և կից օրենսդրական փաթեթը:
«Օրենքի նախագիծը բազմիցս քննարկվել է թե՛ Կառավարությունում, թե՛ քաղաքացիական հասարակության հետ: Կարելի է ասել, որ օրենքը նոր խմբագրությամբ է շարադրվել, փոփոխությունները բավականին շատ են»,- ասել է նախարարը և հավելել, որ հիմնական հասկացություններում ևս շատ են փոփոխությունները:
Սահմանվում են Հայաստանի Հանրապետությունում ռազմավարական էկոլոգիական գնահատման, շրջակա միջավայրի վրա ազդեցության գնահատման, անդրսահմանային ազդեցության գնահատման, շրջակա միջավայրի վրա ազդեցության պետական փորձաքննության, հանրության ծանուցման, հանրային լսումների իրականացման, պետական փորձաքննական եզրակացության տրամադրման, ուժը կորցնելու, շրջակա միջավայրի վրա ազդեցության գնահատման, փորձաքննության և նախատեսվող գործունեության իրականացման գործընթացներում նախաձեռնողների իրավունքների ու պարտականությունների հետ կապված հարաբերությունները:
Առաջարկվող փոփոխությունների շրջանակում պարզեցվել են շրջակա միջավայրի ու մարդու առողջության վրա հնարավոր ազդեցություն ունեցող հիմնադրույթային փաստաթղթի մշակման և նախատեսվող գործունեության իրականացման նպատակով փորձաքննական եզրակացության տրամադրման հետ կապված գործընթացները:
Պատգամավոր Գառնիկ Դանիելյանը հետաքրքրվել է, թե ինչպես է որոշվում` ո՞րն է համարվում ազդակիր համայնք: Նախարար Հակոբ Սիմիդյանը տեղեկացրել է, որ ազդակիր համարվում է հանքավայրին ամենամոտ գտնվող բնակավայրը: Նրա խոսքով՝ հարցով հետաքրքրված են քաղհասարակության ներկայացուցիչները, հարցը քննարկման փուլում է, և ակնկալվում է, որ քննարկումների արդյունքում կսահմանվեն որոշակի չափորոշիչներ:
Նախագիծը ստացել է հանձնաժողովի դրական եզրակացությունը:
