Մոսկվայում ընթանում է ՀՀ և ՌԴ ԱԳ նախարարներ Արարատ Միրզոյանի և Սերգեյ Լավրովի ասուլիսը։ Լավրովը, մասնավորապես, հայտարարել է. «Մանրամասն քննարկել ենք Ղարաբաղում ու Լաչինի միջանցքում իրավիճակի կարգավորման հարցերը։ Ընդգծել ենք բանակցային գործընթացի վերականգնման կարևորությունը՝ Ռուսաստանի, Ադրբեջանի ու Հայաստանի ղեկավարների եռակողմ հայտարարությունների հիման վրա։
Հարավային Կովկասում տրանսպորտային ապաշրջափակման զգալի աշխատանքներ են տարվել, հույս ունենք, որ մոտ ժամանակներս փոխվարչապետները կոնկրետ համաձայնությունների կհասնեն։ Հույս ունենք նաև ռուսական կողմի կոնսուլտացիայի միջոցով հայ-ադրբեջանական սահմանի սահմանազատման ու սահմանագծման իրականացման առաջընթաց գրանցել՝ կրկին համաձայն մեր ղեկավարների եռակողմ համաձայնությունների։ Վստահ եմ, որ այս խոսակցությունը կամրապնդի մեր փոխադարձ գործակցությունը և կնպաստի Հարավային Կովկասում անվտանգության ու կայունության պահպանմանը»։
