«Քաղաքացիական պայմանագիր» խմբակցության պատգամավոր Նարեկ Ղահրամյանի խոսքով՝ ադրբեջանցիների սադրանքի նպատակը ոչ թե Տեղ գյուղը գրավելն է, այլ խաղաղության պայմանագրի բանակցությունները խաթարելը:
Ըստ նրա՝ երեկ էլ պետք է լինեին բանակցություններ ադրբեջանական կողմի հետ, Կորպուսի հրամանատարը տեղում է եղել, որպեսզի պայմանավորվածություն ձեռք բերվի, ակայն բանակցություններ տեղի չեն ունեցել, Ադրբեջանը դիմել է սադրանքի։
«Երբ մոտեցել է պիկապը, այնպես չէ, որ կրակելով է մոտեցել: Կարող է՝ մտածել են, որ հենց այդ բանակցողներն են եկել, կարող է մտածել են, որ ինչ-որ այլ առիթով են եկել: Եթե տեսել եք տեսանյութը, այնտեղ մոտ 20 մետր է դիրքերի հեռավորությունը, եւ եթե կրակելու լինեն, 20 մետրից միշտ էլ կարելի է կրակել։ Բանակցություններից Ադրբեջանը չի հրաժարվել, որովհետև հետո էլի եղան բանակցություններ, որ կանգնեցին մարտերը: Այդ պահին եղել է սադրանք, սկսվել է հրաձգություն, որը վերածվել է մեծ մարտի»,– ԱԺ–ում լրագրողների հետ զրույցում ասաց նա:
Ղահրամյանը շեշտեց՝ ՀՀ–ն երբեք չի ապավինել ադրբեջանցիների ողջախոհությանը․ «Ոչ մի դեպքում որևէ մեկի ողջախոհությանը, բացի մերից, մենք չենք ապավինում»:
Հարցին, թե ինչ նպատակ ունեն ադրբեջանցիները, ուզում են գրավե՞լ Տեղ գյուղը, պատգամավորն արձագանքեց. «Ոչ, ուղղակի սադրանքի են դիմում խաղաղության բանակցությունները խաթարելու համար: Իրենք մեզ են մեղադրում նույնի համար, բայց հասկանում ենք, թե ում ձեռնտու չի այս ամեն ինչը»:
