Տեղ գյուղում վիրավորում ստացած զինծառայողների առողջական վիճակն ամեն օր ավելի է լավանում: Այս մասին այսօր խորհրդարանում լրագրողների հետ ճեպազրույցում ասաց Առողջապահության նախարար Անահիտ Ավանեսյանը։
«Բարեբախտաբար վիրավորում ստացած զինծառայողների առողջական վիճակն ամեն օր ավելի է լավանում, ծայրահեղ ծանր վիճակում գտնվող պացիենտի վիճակն ավելի է կայունանում ու դեպի ապաքինում է գնում», – նշեց նա։ Անահիտ Ավանեսյանի խոսքով՝ վիրավորում ստացած զինծառայողների կյանքին այլևս վտանգ չի սպառնում։ Նախարարը հավելեց, որ վիրավորներից երեքը դեռ ստացիոնար բուժում են ստանում։ Հիշեցնենք, որ ապրիլի 11-ին ՀՀ-Ադրբեջան սահմանի Տեղ գյուղի հարակից հատվածում ադրբեջանական զինուժը դիմելր էր սադրանքի, ինչի հետևանքով հայկական կողմն ուներ 4 զոհ, 6 վիրավոր, որից մեկը՝ ծայրահեղ ծանր: Առողջապահության նախարարը նաև տեղեկացրեց, որ Ազատ գյուղի զորանոցի հրդեհի հետևանքով այրվածքներ ստացած զինծառայողների առողջական վիճակն էլ է բարելավվել և նրանց բուժումը շարունակվում է:
