Ամերիկայի Հայ Դատի հանձնախմբի (ANCA) գործադիր տնօրեն Արամ Համբարյանը հայտարարություն է տարածել Ամերիկայի Միացյալ Նահանգների նախագահ Ջո Բայդենի ապրիլքսանչորսյան ուղերձիվերաբերյալ:
«Այսօր նախագահ Բայդենը վերաշրջանառել է 1915-23 թվականների Հայոց ցեղասպանությունը ճանաչող ապրիլքսանչորսյան անցած հայտարարությունները՝ առանց որևէ կերպ հիշատակելու իրենց բնիկ հայրենիք Արցախում ապրող հայերի դեմ Ադրբեջանի կողմից շարունակվող ցեղասպանությանը»,- նշվում է Համբարյանի հայտարարության մեջ:
ANCA-ի գործադիր տնօրենը նշել է, որ սա սառն ու հաշվարկված քայլ է, որը շատ ավելին է, քան բաց թողնված հնարավորությունը, որն «ազդարարում է Ադրբեջանին, որ ԱՄՆ-ը նավթով հարուստ Ալիևի վարչակարգի վրա չի դնի ծախսեր ու հետևանքներ՝ Արցախի և Հայաստանի դեմ սրվող էթնիկ զտումների և ոչնչացման մակարդակի ագրեսիայի համար»։
«Սա անտարբերության սահմռկեցուցիչ հաղորդագրություն է ուղարկում ամերիկացիներին և ամերիկացիների դաշնակիցներին, ինչպես նաև Արցախի և Հայաստանի ժողովրդին՝ այս դարավոր ոճրագործության զոհերի հանդեպ կեղծ կարեկցանքի բարակ ծածկույթի ներքո»,- ասվում է հայտարարության մեջ:
«Այսօրվա հայտարարությունը, ցավոք, համահունչ է քաղաքականությանը մի նախագահի, որը միացավ Կոնգրեսին (և 50 նահանգներին)՝ ճանաչելով Հայոց ցեղասպանությունը 2021 թվականին, այնուհետև 24 ժամվա ընթացքում կանաչ լույս վառեց ԱՄՆ-ի ռազմական օգնությանն Ադրբեջանին՝ մի դժոխային երկրի, որը ցանկանում է ավարտին հասցնել այս հանցագործությանը: Նախագահի կողմից 1915 թվականի ցեղասպանության զոհերին հարգելու պատշաճ ձևը 2023 թվականի՝ Արցախի էթնիկ զտումները դադարեցնելն է, և դա սկսվում է Ադրբեջանին ԱՄՆ ռազմական օգնության դադարեցումից»,- եզրափակված է հայտարարության մեջ:
