Հայաստանի իմունականխարգելման ազգային ծրագրի ղեկավար, ԱՆ հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ Գայանե Սահակյանն անդրադարձել է պատվաստումային գործընթացին, շեշտելով, որ ՀՀ-ում այն բարձր մակարդակով է իրականացվում:
«Գրեթե բոլոր երկրներում կարմրուկի բռնկման դեպքեր են գրանցվում: Նույնիսկ երկրներ կան, որ բավական մեծ թվով բռնկումը մեծ տարածում է ստացել: Վերջերս Ռուսաստանի Դաշնությունը տարածեց հաղորդագրություն, որ 44 երկրամաս կարմրուկի բռնկման մեջ է, և երկրում մասսայական պատվաստումներ են իրականացվում:
Այն, որ ՀՀ-ում մենք խնդիր չունեցանք, բերովի դեպքերի հետ կապված՝ լոկալ բռնկում գրանցվեց, և ներկայում համաճարակաբանական իրավիճակը հանդարտ է, կրկին ապացուցեց, որ ՀՀ-ում պատվաստումները բավականին բարձր մակարդակով են իրականացնում, և մենք ունենք կոլեկտիվ իմունիտետ, կոլեկտիվ պաշտպանվածություն: Միայն այն փաստը հաշվի առնելով, որ կարմրուկը վարակիչ հիվանդություններից ամենավարակելին է, այսինքն՝ 10 շփվածից 9-ը հաստատ հիվանդանում են, մեր երկրում շատ տարածում չստացավ, և, բարեբախտաբար, մենք շարունակում ենք էլիմինացված կարգավիճակը պահպանել»,- ասել է նա՝ հավելելով,- «Այս պահին մեր պատվաստումների ազգային օրացույցով մենք 15 պատվաստանյութով պայքարում ենք 18 հիվանդության դեմ, կառավարվում է 18 վարակիչ հիվանդություն»:
