ՀՀ վարչապետ Նիկոլ Փաշինյանն Ադրբեջանին մեղադրել է տարածաշրջանում իրավիճակը սրելու մեջ՝ մատնանշելով Լաչինի միջանցքում անցակետի ապօրինի տեղադրումը. «Եթե մինչև հիմա Լաչինի միջանցքը փակ էր կեղծ բնապահպանական ակցիայի պատրվակով, հիմա պաշտոնապես է փակվել Ադրբեջանի կողմից։ Սա ոչ միայն տարածաշրջանում լարվածությունը մեծացնելուն, այլև ԼՂ-ում հաստատված հումանիտար ճգնաժամը խորացնելուն ուղղված սադրիչ քայլ է»։
Նա ասել է, որ անցակետի տեղադրմանը միջազգային հանրությունն իր գնահատականը տվել է։ Ըստ Փաշինյանի՝ Ադրբեջանի նպատակը ԼՂ հայության էթնիկ զտում ու ցեղասպանություն իրականացնելն է. «Լաչինի միջանցքում հսկիչ անցագրային կետի տեղադրումը 2020թ. նոյեմբերի 9-ի եռակողմ հայտարարության 6-րդ կետի կոպտագույն խախտում է»։
Փաշինյանը շեշտել է, որ Ադրբեջանն այս ընթացքում խախտել է եռակողմ հայտարարության բոլոր կետերը։
