ՀՀ ԱԺ «Քաղաքացիական պայմանագիր» խմբակցության ղեկավար Հայկ Կոնջորյանի գլխավորած պատվիրակությունն աշխատանքային այցով Կիպրոսում է։ Այս մասին հաղորդագրություն է տարածել Ազգային ժողովի հասարակայնության հետ կապերի և հաղորդակցության վարչությունը։
Հաղորդագրության համաձայն՝ Հայկ Կոնջորյանը, խմբակցության պատգամավորներ Վլադիմիր Վարդանյանը, Ռուստամ Բաքոյանը, Արուսյակ Մանավազյանը, Կարեն Համբարձումյանն ու Հայկ Ցիրունյանը Կիպրոսի Հանրապետություն կատարած այցի շրջանակում մայիսի 2-ին հանդիպել են երկրի նախագահ Նիկոս Խրիստոդուլիդիսի հետ:
Կիպրոսի Հանրապետության նախագահը «չափազանց բարձր է գնահատել Հայաստանի եւ Կիպրոսի միջեւ եղբայրական հարաբերությունները»: «Փոխադարձաբար ընդգծվել է միջխորհրդարանական համագործակցության բարձր մակարդակը, եւ քննարկվել են դրանք խորացնելու նոր հեռանկարները: Պատվիրակությունը Կիպրոսի Հանրապետության նախագահին է ներկայացրել Ադրբեջանի կողմից Լաչինի միջանցքում ապօրինի անցակետ տեղադրելու հարցը»:
«Կողմերը քննարկել են Ադրբեջանի հետ ընթացող խաղաղության գործընթացը, առկա մարտահրավերները եւ դրանց լուծման ուղիները»,- ասված է հաղորդագրության մեջ:
