2022թ. ուժի մեջ մտած «Քաղաքացիության մասին» օրենքում փոփոխությունների արդյունքում քաղաքացիության վերաբերյալ հրամանագրերի թվային ցուցանիշներն ավելացել են. այս մասին տեղեկացրել է Հայաստանի նախագահի աշխատակազմի ղեկավարի տեղակալ Խաչատուր Պողոսյանը։ Նրա խոսքով՝ 2021թ. նախագահի կողմից ստորագրվել է քաղաքացիության վերաբերյալ շուրջ 60, իսկ 2022թ.՝ 114 հրամանագիր. «Արդյունքում, 2022թ. քաղաքացիություն է շնորհվել շուրջ 19600 անձի՝ 2021թ․ 7300-ի փոխարեն»։
Պողոսյանը նաև տեղեկացրել է, որ 2022թ. նախագահի հրամանագրերով դադարեցվել է 4400 անձի քաղաքացիություն։
Նախագահի կողմից ստորագրվել է ԶՈւ բարձրագույն հրամանատարական կազմի, օտարերկրյա պետություններում և միջազգային կազմակերպություններում դիվանագիտական ներկայացուցիչների և դատավորների պաշտոններում նշանակման 128 հրամանագիր։
Շքանշաններով և մեդալներով պարգևատրվել է 680 անձ։
Նախագահի կողմից շնորհվել է 12 պատվավոր կոչում, 17 բարձրագույն դիվանագիտական աստիճան, 6 դասային աստիճան, 4 բարձրագույն զինվորական կոչում։
Իրականացվել է 16 բարեգործական և 9 նախագահական նախաձեռնությունների ծրագիր։
Նախագահի աշխատակազմին 2022թ. նախագահի լիազորությունների ապահովում ծրագրով ծախսվել է 1 մլրդ 231 մլն դրամ։
