Ազգային ժողովի պատգամավոր Նիկոլայ Բաղդասարյանը խորհրդարանի քննարկմանն է ներկայացրել նախագիծ, որով առաջարկում է սահմանել, որ երթևեկության խախտումների տուգանքները բողոքարկելու համար մինչև դատարան հասնելը քաղաքացին պետք է դիմի ըստ վերադասության՝ վարչական մարմին։
Բաղդասարյանը բացատրեց, որ իր հետ նախկինում դեպք է եղել, երբ որպես պաշտպան ներկայացել է այդպիսի դատաքննության, ու պարզվել է, որ հաջորդ տարվա նույն օրն է նշանակված եղել դատը։ Ըստ այդմ՝ պատգամավորն առաջարկում է այս նախագծով թեթևացնել վարչական դատարանների ծանրաբեռնվածությունը։
«Պատկերացրեք, որ մի վարչական ակտ պետք է բողոքարկես, պետավտոտեսուչը Ձեզ տուգանել է 4000 դրամ, բայց դու սպասում ես 2-3 տարի, մինչև էտ հարցի պատասխանը ստանաս», – ներկա իրավիճակը բնութագրեց Բաղդասարյանը։
Նրա նախագծով նաև առաջարկվում է, որ բողոքարկումները դիտարկող վարչական մարմինն իր եզրակացությունը պետք է տա ոչ թե 30, այլ 15 օրում, ինչից հետո քաղաքացին, եթե համաձայն չէ, կարող է դիմել դատարան։
