Թբիլիսին պատրաստ է նորից ստանձնել Երևանի և Բաքվի միջև միջնորդի դերը, այսօր՝ հունիսի 16-ին, Վրաստանի խորհրդարանում ելույթի ժամանակ հայտարարել է արտգործնախարար Իլյա Դարչիաշվիլին, գրում է eadaily.com-ը։

«Խաղաղ հարևանության նախաձեռնության շրջանակում Վրաստանը նախկինում քայլեր է ձեռնարկել երկու հարևան երկրների միջև կառուցողական երկխոսություն սկսելու համար։ Մենք մեր պատրաստակամությունն ենք հայտնում շարունակելու մեր գործունեությունն այս ուղղությամբ», – ասել է պաշտոնյան:

Նրա խոսքով՝ Վրաստանը կարծում է, որ տարածաշրջանում խաղաղության ու կայունության ապահովմանն ուղղված իր ջանքերն արդյունավետ կլինեն:

«Մենք պատրաստ ենք զգալի ներդրում ունենալ այդ գործում», -ասել է Դարչիաշվիլին:

2020 թվականի աշնանն Արցախում 44-օրյա պատերազմից հետո Թբիլիսին հումանիտար և դիվանագիտական փորձեր է արել Երևանն ու Բաքուն մերձեցնելու և նրանց միջև երկխոսություն սկսելու համար։ 2021 թվականին վրացական կողմի միջնորդությամբ Ադրբեջանի մայրաքաղաքում պահվող 15 հայ ռազմագերիներ ազատ են արձակվել՝ Արցախի ականապատ դաշտերի քարտեզների դիմաց։ Անցյալ տարվա հուլիսին Թբիլիսիում տեղի է ունեցել Հայաստանի և Ադրբեջանի արտգործնախարարների առաջին երկկողմ հանդիպումը։