Ազգային ժողովի «Բարգավաճ Հայաստան» խմբակցության պատգամավոր Նաիրա Զոհրաբյանը արձագանքել է Ադրբեջանի պաշտպանության նախարարի ռազմատենչ հայտարարություններին և իր ֆեյսբուքյան էջում գրել.
«Ադրբեջանի պաշտպանության նախարար Զաքիր Հասանովը կրկին մտել է ալիևյան քաղաքական էլիտային բնորոշ կլասիկ մառազմի փուլ: Զաքիր «նվաճողը» սպառնացել է շուտափույթ պատերազմով ու ռազմական նոր գործողություններով, որի մասին, պարզվեց, իրենք երազում եմ ամեն օր:
Կարծում եմ, որ Մինսկի խմբի համանախագահող երկրները, ովքեր շատ զգայուն են Հայաստանից արվող ցանկացած հայտարարության հանդեպ, առնվազն պիտի արձագանքեն բանակցային գործընթացը ուղղակի վտանգող նման հայտարարությանը: Մինսկի խմբից դեռ լռություն է:
Ինչ վերաբերում է Հասանովի հոգեկան անդորրը խախտած հայտարարությանը, ապա հերթական անգամ համոզվում ես, որ «Մանչեսթեր Ցունայթեդից» 40 տարով երիտասարդ Ադրբեջանն ու իր քաղաքական իսթեբլիշմենթը ինտելեկտուալ օբյեկտիվ խնդիրներ ունեն հասկանալու, որ Արցախը մեզանից յուրաքանչյուրն է ու վերջ»:
Հիշեցնենք, որ Ադրբեջանի ՊՆ ղեկավարը, արձագանքելով Նիկոլ Փաշինյանի՝ «Արցախը Հայաստանն է ու վերջ» արտահայտությանը, հայտարարել էր. «Մենք մեր խոսքը կասենք պատերազմի դաշտում, և մենք երազում ենք այդ մասին…»:
https://www.facebook.com/photo.php?fbid=530073447813051&set=a.102014030618997&type=3&theater
