«Սահմանների սահմանազատումն ու սահմանագծումը ոչ թե սահմանների բացակայության մասին են վկայում, այլ հակառակը՝ որոշված, այսինքն՝ խորհրդային Հայաստանի և խորհրդային Ադրբեջանի միջև ԽՍՀՄ փլուզման պահին գոյություն ունեցած վարչական սահմանագծերի վերահաստատման և հողի վրա դրանց արտացոլման գործընթացն է որպես պետական սահման»,- հայտարարել է ՀՀ վարչապետ Նիկոլ Փաշինյանը։
Նա վերահաստատել է Հայաստանի հավատարմությունը՝ միմյանց 86․600 և 29․800 քառակուսի կիլոմետր տարածքային ամբողջականության ճանաչման հիման վրա ՀՀ-ի և Ադրբեջանի միջև խաղաղություն հաստատելու պայմանավորվածությանը։ «Սպասում ենք Ադրբեջանի կողմից այդ պայմանավորվածության հրապարակային վերահաստատմանը»,- ասել է նա։
Փաշինյանը նշել է, որ ի հեճուկս բոլոր բարդությունների, երկարաժամկետ, կայուն և տևական խաղաղություն հասնելու հնարավորություն ունենք. «Ադրբեջանին կոչ եմ անում զերծ մնալ այդ հնարավորությունը նվազեցնելուն ուղղված քայլերից, ինչպես օրինակ՝ միջազգային մեխանիզմի շրջանակներում Բաքու-Ստեփանակերտ երկխոսության շարունակական տորպեդահարումը, Լաչինի միջանցքի ապօրինի արգելափակումը և շաբաթվա սկզբին Լաչինի միջանցքից Կարմիր խաչի կողմից Երևան տեղափոխվող ԼՂ բնակիչ Վագիֆ Խաչատրյանի առևանգումը»,- ասել է նա։