ԱՄՆ Ներկայացուցիչների պալատի անդամ Ադամ Շիֆը Միացյալ Նահանգների իշխանություններին կոչ է արել վերջ դնել Արցախի հայ բնակչության շրջափակմանը և կանխել հայերի հերթական ցեղասպանությունը:
«Արցախում հումանիտար սուր ճգնաժամ է։ Եկեք բարձրաձայնենք, թե ինչ է կատարվում, և ինչ պետք է անի Միացյալ Նահանգները, որպեսզի պատասխանատվության ենթարկի Ադրբեջանին և կանխի հերթական Հայոց ցեղասպանությունը», – X-ի (նախկին Թվիթեր) իր միկրոբլոգում գրել է Շիֆը՝ կից հրապարակելով տեսաուղերձ:
Ինչպես նշել է Շիֆն իր տեսաուղերձում, սնունդը, դեղորայքն ու այլ անհրաժեշտ պարագաները չեն հասնում Արցախի120 հազար բնակչին, ինչի հետևանքով մարդիկ սկսել են մահանալ:
«Այս պահին Լեռնային Ղարաբաղում 120 հազար հայ բնակիչ շրջափակման մեջ է: Կա ճանապարհ, որը կոչվում է Լաչինի միջանցք և Լեռնային Ղարաբաղը կապում է Հայաստանին, և Ադրբեջանը փակել է այս տարածաշրջան ելքն ու մուտքը: Արդյունքում ստեղծվել է հումանիտար սուր ճգնաժամ: Սա պետք է շտապ հասցեագրվի»,- նշել է կոնգրեսականը:
Նրա խոսքով՝ վերջերս տեղի ունեցել ՄԱԿ-ի Անվտանգության խորհրդի նիստ, որին, սակայն, ոչինչ չի հետևել:
«Հարկավոր է բանաձև, որը կպահանջի վերջ տալ միջազգային իրավունքի այս խախտմանը: Այնտեղ գտնվող մարդկանց համար անհրաժեշտ են սննդի և դեղորայքի մատակարարումներ, այդ մարդկանց հարկավոր է ազատ տեղաշարժի հնարավորություն, և ԱՄՆ կառավարությունը, նախագահ Բայդենի վարչակազմը շատ բան պետք է անեն այդ ուղղությամբ»,- շեշտել է նա:
Ինչպես ընդգծել է Շիֆը, ԱՄՆ կառավարությունը պետք է Ադրբեջանին զրկի ռազմական օգնությունից և չպետք է որևէ գումար տրամադրի:
«Մենք չենք կարող լռել: Վարչակազմը պետք է խոսի, պետք է գործի, ինչ-որ բան պետք է արվի՝ հակառակ դեպքում ավելի շատ մարդիկ կմահանան: Ադրբեջանն արդեն պատերազմ է սկսել Հայաստանի դեմ, ինչի հետևանքով հազարավոր մարդիկ զոհվեցին, նրանք շարունակում են ռազմագերիներին պահել ապօրինաբար, միջազգային իրավունքի խախտումներով, նրանց դատապարտում են առանց պատճառի: Սրան պետք է վերջ դրվի»,- նշել է կոնգրեսականը՝ հավելելով, որ ԱՄՆ-ն առաջին հերթին պետք է դադարեցնի Լաչինի միջանցքի ապօրինի շրջափակումը:
«Ես խորապես մտահոգված եմ, որ ևս մի ցեղասպանություն է պատրաստվում հայ ժողովրդի դեմ: ԱՄՆ վարչակազմը պետք է գործի»,- եզրափակել է նա:
