Մեր ունեցած տեղեկատվությամբ ԼՂ-ում հրադադարի հաստատումից հետո ՊԲ ստորաբաժանումները շարունակում են մնալ այն տեղերում, որտեղ գտնվել են հրադադարի հաստատման պահին։ Նույնը վերաբերվում է Ադրբեջանի զինված ուժերին։ Այս մասին այսօր ուղիղ եթերի ժամանակ հայտարարեց ՀՀ վարչապետ Նիկոլ Փաշինյանը՝ անդրադառնալով ԼՂ-ում ստեղծված իրավիճակին։
«Մեկ միջադեպ է այսօր, ցավոք, տեղի ունեցել Ստեփանակերտի մոտակայքում, ընդհանուր առմամբ, հրադադարի ռեժիմը պահպանվում է՝ տեղ-տեղ որոշակի խախտումներով»,-ասաց Նիկոլ Փաշինյանը։
Անդրադառնալով ԼՂ-ից տեղահանվածների հարցին Փաշինյանը նշել է, որ այս շաբաթվա սկզբին դեռ հանձնարարական է տվել, որ աշխատանքային խումբ ձևավորվի ԼՂ-ից տեղահանված, փախստական դարձած մարդկանց տեղափոխության ու կեցության կարիքները հոգալու համար։
«Նման բան չկա, որ հատուկ տարածում են թեման, թե Հայաստանը չի ցանկանում ընդունել ԼՂ-ից եկող մարդկանց»։
«Տեղեկություն ունենք, որ նախորդ օրը շուրջ 10,000 մարդ հրավիրվել է Ստեփանակերտի օդանավակայան, նրանց ասվել է եկեք, որովհետև, հնարավոր է, տեղափոխվեք ՀՀ։ Նրանց լուսանկարել են, տեսանկարահանել են, և հետո ասել ՀՀ-ն թույլ չի տալիս դուք գնաք ՀՀ։ Հետո այդ լուսանկարներն են հրապարակվել։ Ինձ համար ակնհայտ է՝ սա արվում է ՀՀ-ում ներքաղաքական ցնցումներ և քաոս առաջացնելու համար»,-հայտարարել է Փաշինյանը։
