Եթե ռուս խաղաղապահները հեռանան, ապա Հայաստանի համար սկզբունքային նշանակություն չունի՝ նրանք կմեկնեն Հայաստանով, թե Ադրբեջանով, Հանրայինի եթերում հայտարարել է ՀՀ վարչապետ Նիկոլ Փաշինյանը։
«ՀՀ տարածքում նրանց մնալու իրավական ոչ մի հիմք և հիմնավորում չկա և չի կարող լինել»,- ասել է վարչապետը։
Անդրադառնալով ՌԴ սահմանապահ զորքերի և 102-րդ ռազմաբազայի Հայաստանում մնալու հարցին, վարչապետը նշել է, որ նրանց մնալու հիմքերը շատ պարզ են, դրանք շարունակում են գոյություն ունենալ, և ՀՀ-ն և ՌԴ-ն նման հարց չեն բարձրացնում։ «Ոչ բոլոր խնդիրներն են միմյանց հետ փոխկապակցված»,- նշել է Փաշինյանը։
Նա նաև խոսել է Բրյուսելում նախատեսված առաջիկա հանդիպման մասին։
«Գրանադայում՝ ԵՄ հարթակում, արձանագրվեցին սկզբունքները։ Բրյուսելյան հանդիպումը պետք է տեղի ունենա այդ սկզբունքների շրջանակում։ Երբ Ադրբեջանը փորձ է անում այլ հարթակ առաջարկել, ուզում է արդեն իսկ պայմանավորված սկզբունքները չեղարկել»,- ասել է վարչապետը։
