«2024թ. խաղաղության պայմանագրի կնքման հարցում զգուշավոր լավատեսություն կա». Պապոյան

ՔՊ փոխնախագահ, ԱԺ ՔՊ խմբակցության պատգամավոր Գևորգ Պապոյանը լրագրողների հետ ճեպազրույցում անդրադարձել է 8 գյուղերի մասին Ադրբեջանից հնչող հայտարարություններին։

«Հայաստանը երբեք ոչինչ չի խոստացել, Հայաստանը հայտարարել է, որ 1974-1975թթ․ քարտեզներով պատրաստ է սահմանների դելիմիտացիայի և դեմարկացիայի, իսկ, օրինակ, այդ քարտեզներով նույն Տավուշում կա 7-8 գյուղ, որոնց վարելահողերն ամբողջովին Ադրբեջանի վերահսկողության տակ են»,– նշեց նա։ 

Պապոյանը վստահեցնում է, որ խաղաղության պայմանագրի կարևորագույն դրույթներից մեկը հենց այն է, որ արձանագրվի Հայաստանի տարածքային ամբողջականությունը՝ 29․800 կմ² տարածքով, ճանապարհների ապաշրջափակումը, տևական խաղաղությունը․ «Այս համատեքստում խաղաղության պայմանագրում չպետք է լինեն դրույթներ, որոնք իրենց մեջ կարող են ռումբեր պարունակել: Պետք է լինի այնպիսի պայմանագիր, որ չառաջացնի այլ խնդիրներ և նոր պատերազմի հավանականություն»,-ասաց նա։

Գևորգ Պապոյանի խոսքով՝ 2024թ. խաղաղության պայմանագրի կնքման հարցում զգուշավոր լավատեսություն կա. «Մեծ հաշվով՝ հիմնական, առանցքային հարցերի շուրջ ըմբռնում կա։ Միակ հարցը, որ ըմբռնում չկար, այսպես կոչված՝ միջանցքի հարցն է։ Բայց այդ հարցն, իմ տպավորությամբ, գոնե Ադրբեջանի ու Թուրքիայի հրապարակային հայտարարություններից դուրս է եկել, և ասում են, որ դա իրենց պետք չի, քանի որ տնտեսապես ավելի հարմար ճանապարհ են գտել»։