Արհեստական բանականության գերժամանակակից ռազմավարությունները ուսումնասիրելու ու դրա շուրջ ոլորտի առաջնորդներին, նորարար մտածողներին և արհեստական բանականության փորձագետներին համախմբելու նպատակով մեկնարկել է «Արհեստական բանականությունը բիզնեսի համար» համաժողովը:
Կոնֆերանսի բանախոսների թվում են «Embodied» ընկերության հիմնադիր և գործադիր տնօրեն Պաոլո Փիրջանյանը, «McKinsey & Company»-ի գործընկեր Լեոնիդ Կիրակոսյանը և ABBYY ընկերության հիմնադիր Դավիթ Յանը:
«Արհեստական բանականությանը իր նշանակությամբ համեմատվում է ոչ թե էլեկտրականության կամ ինտերնետի, այլ գրերի գյուտի հետ, այսինքն՝ շրջադարձային ազդեցություն ունի թե՛ տնտեսության, թե՛ մարդկության համար: Մեզ համար այս կոնֆերանսը կարևոր է նրանով, որ համընկնում է մեր տնտեսական քաղաքականության գլխավոր նպատակի հետ, դա աշխատանքի արտադրողականության բարձրացումն է: Արհեստական բանականությունը բոլոր միջազգային խորհրդատվական, գիտական կենտրոնների կողմից համարվում է արտադրողականության խթանման հզոր գործոն»,- ասաց ՀՀ էկոնոմիկային նախարար Վահան Քերոբյանը:
Հայաստանի բարձր տեխնոլոգիական արդյունաբերության նախարար Մխիթար Հայրապետյանն էլ նշեց՝ պետք է մտածել, թե ինչպես ներդնել արհեստական բանականության գործիքները Հայաստանի տնտեսության, թվայնացման, տեղեկատվական գիտության ոլորտում: Այդ առումով նա կարևորեց համաժողովը, որը հնարավորություն է տալիս հասկանալ, թե որոնք են դրան հասնելու արդյունավետ ճանապարհները:
ԱԺ նախագահի տեղակալ Հակոբ Արշակյանն ընդգծեց՝ արհեստական բանականությունը շատ մոտ ապագայում մեծ փոփոխություններ է անելու աշխարհում, և այն ընկերությունները և պետությունները, որոնք չեն սովորի օգտագործել արհեստական բանականության բոլոր դրական հնարավորությունները, կարող են հայտնվել շատ խորը ճգնաժամի և հետամնացության մեջ:
Կենտրոնական բանկի նախագահ Մարտին Գալստյանն էլ առանձնացրեց՝ ոլորտում հաջողությունների հասնելու միակ գրավականը բիզնեսի, կառավարության, ակադեմիական աշխարհի, հասարակական և խորհրդատվական կազմակերպությունների համատեղ աշխատանքի մեջ է:
Կոնֆերանսի կազմակերպիչներն են ՀՀ էկոնոմիկայի նախարարությունը, Հայաստանի կենտրոնական բանկը, «Հայաստանի իրավագիտություն» հիմնադրամը, Skill Event Marketing company-ն:
