Եվրոպական խորհուրդը հաղորդագրություն է տարածել, ըստ որի` Բրյուսելում փետրվարի 13-ին կայանալու է ԵՄ-Հայաստան գործընկերության խորհրդի հինգերորդ հանդիպումը։
«ԵՄ-ն և Հայաստանը տեսակետներ կփոխանակեն ԵՄ-Հայաստան Համապարփակ և ընդլայնված գործընկերության համաձայնագրի իրականացման վիճակի և ԵՄ-Հայաստան գործընկերության առաջնահերթությունների, ինչպես նաև ԵՄ-Հայաստան գործընկերության առավել հավակնոտ օրակարգ առաջ մղելու հնարավորության վերաբերյալ:
Կքննարկվեն քաղաքական երկխոսությանն ու բարեփոխումներին, ժողովրդավարությանը, օրենքի գերակայությանն ու մարդու իրավունքներին, տնտեսական, առևտրային և ոլորտային համագործակցությանը, ինչպես նաև միգրացիային վերաբերող հարցեր, շարժունակության և վիզայի ազատականացման երկխոսության մեկնարկի հեռանկարները:
Այնուհետև մասնակիցները կարծիքներ կփոխանակեն քաղաքական հարցերի, ներառյալ՝ տարածաշրջանային հարցերի և արտաքին և անվտանգության քաղաքականության վերաբերյալ:
Գործընկերության խորհուրդը կնախագահի ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելը։ Հայաստանյան պատվիրակությունը կգլխավորի Հայաստանի Հանրապետության արտաքին գործերի նախարար Արարատ Միրզոյանը»,- ասված է հայտարարության մեջ։
